Apta basynda Alataý aıasyndaǵy megapolıste «Almaty arýy-2017» baıqaýy márege jetip, bar bolǵany 17 jastaǵy Sábına Ázimbaeva jeńimpaz tájin kıdi.
Bul jeńistiń basty baqyty – ajarymen, aqylymen, ónerimen aldyna jan salmaǵan arýǵa kelesi jyly AQSh-ta ótetin «Álem arýy-2018» baıqaýynda muqym qazaq qyzdarynyń kórkin pash etý buıyrdy. «Almaty arýy» atanǵan qyzdarǵa 2015 jyldan beri álemdik minberge jol ashylǵanyn aıta ketelik.
Sábınalardyń bári sulý, buǵan deıin de Sábına Altynbaeva eshkimge uqsamaıtyn qazaq qyzdarynyń súıkimdiligin kúlli álemge tanytqan. Endi «Turan» kolledjiniń stýdenti kelesi jyly álemniń eń sulý da bilimdi boıjetkenderi kóterilgen minberden tabylmaq.
Bir kúnde aıy ońynan týǵan Sábına mamandyǵy boıynsha bolashaq aýdarmashy ári gıd. Ony jasynan eresek kórsetetin syrt kelbeti ǵana emes, tirligi, ózin ózi ustaýy desek jańylysa qoımaspyz.
Qysqasy, bıyl «Almaty arýy-2017. Sulýlyq qýaty» ataýymen ótken kezekti baıqaýǵa qatysýǵa 400-den astam qyz umtylǵan. Olardyń arasynan 10 sulý ǵana qazylar alqasynyń barlyq talaptarynan tabyldy. Taǵy bir qyzyǵy, bıyl birinshi ret atalmysh baıqaýda qyzdardyń erekshe bir talanty synǵa tústi. Baıqaýdyń aqtyq baǵdarlamasyna qoıylǵan bul kezeńge qyzdar baryn saldy. Kórermender de kóńildi boldy.
Jarys barysynda arýlardyń barlyǵy da baǵyna sıynǵany sózsiz. О́ıtkeni bul jarysta jeńimpaz bolý bir bólek te, túrli múmkindikterge ıe bolý baqyty da bar edi. Máselen, baıqaýdyń bas júldesinen keıingi oryndardy bólisken Alına Melkına men Darıa Galochkınaǵa Grekııada 4 jyl bilim alýǵa jol ashyldy. Olar bul elde aǵylshyn tilin tereń meńgeretin bolady.
Al qazylar alqasyna kil sulýdyń ishinen bir sulýdy tańdaý shynynda da ońaı bolmaǵan. Jastardyń bári de kórikti, ónerli. Onyń ústine «Almaty arýy-2017» atanǵan sulý búkil Qazaqstan atynan álemdik baıqaýǵa qatysyp, oǵan tórtkúl dúnıe kóz salatyny taǵy bar.
Degenmen Sábına jarystyń barlyq kezeńderinde ózine senimdi bolǵanyn baıqaý qıyn emes. Qansha tolqysa da bas júldege laıyqpyn degen ishki qýat pen senim onyń túısigin aldamady. Oǵan qosa arýlar baıqaýyna qatysyp jatqan qyzdy kolledji de qoldap, sessııany keıin tapsyrýǵa múmkindik bergen.
Ol birinshi kezekte sportty, onyń ishinde boksty, bıdi jaqsy kóredi. Gennadıı Golovkınniń sporttaǵy jetistikterine súısinedi. Jáne ózin óz eliniń patrıoty dep biletin qyz Qazaqstandy jaqsy qyrynan kórsetý úshin bar ónerin salyp daıyndalmaq.
Aınash ESALI, «Egemen Qazaqstan»
ALMATY