Qazaqstan – kóp ultty, zaıyrly memleket. Uly Dala jerin júzden astam ult pen ulys, túrli din ókilderi mekendeıdi. Tıisinshe, árqaısysynyń quqyǵy teń dárejede saqtalǵan. Keshe Astana qalasynda Evangelııa-Lıýteran shirkeýiniń «Másih» ǵıbadathanasy resmı túrde ashyldy.
Saltanatty is-sharaǵa Din isteri jáne azamattyq qoǵam mınıstri Nurlan Ermekbaev, Vatıkan, Germanııa sekildi birqatar memleketterdiń elshileri, Qazaqstandaǵy lıýteran qaýymdastyǵynyń pas-torlary, dıakondary men músheleri, sondaı-aq elimizge belgili ózge de adamdar qatysty.
Ashylý rásiminde sóz alǵan Din isteri jáne azamattyq qoǵam mınıstri «Másih» shirkeýiniń elimizge rýhanı sáýle shashyp qana qoımaı, jaqsy dástúrlerdiń kóbeıýine yqpal etetindigine senim bildirdi. Sonymen qatar, ol mundaı ǵıbadathananyń ashylýy Qazaqstan halqynyń tatýlyǵy men aýyzbirshiliginiń kelisti bir kórinisi ekenin aıtty.
– Jańa Evangelııa-Lıýteran shirkeýiniń ashylýymen shyn júrekten quttyqtaımyn. Bul ǵımarat protestanttyq shirkeý ókilderiniń ómirinde erekshe kún bolyp esepteletin Reformasııanyń 500 jyldyǵy qarsańynda ashylyp otyr. Al Reformasııa Eýropanyń damýyna úlken septigin tıgizdi. Sondyqtan jańa ǵıbadathanada jasampazdyq pen elimizdiń damýyna baǵyttalǵan ýaǵyzdar jıi aıtylady dep úmittenemin, – dedi Nurlan Ermekbaev.
Lıýterandardy quttyqtaý úshin ózge de shirkeýlerdiń ókilderi qatysty. Olardyń arasynda Pravoslavıe shirkeýiniń Astana eparhııasynyń vakarııi, Taldyqorǵan epıskopy Nektarıı jyly lebizderin bildirip jatty.
Aıta keteıik, Evangelııa-Lıýteran shirkeýin salýǵa baılanysty 2014 jyly arnaıy jer telimi bólindi. Jobanyń bas sáýletshisi – Rımma Slobodskaıa. Keshen eki ǵımarattan turady. Ǵıbadathana ishinde bir mezette 120 adam qulshylyq ete alady. Shirkeýdiń jertólesinde jastardyń bilim alýy úshin barlyq jaǵdaı qarastyrylǵan.
Aıan ÁBDÝÁLI, «Egemen Qazaqstan»