Májilis Tóraǵasy Keızo Takemıdi qabyldady

Kezdesý aıasynda N.Nyǵmatýlın atap ótkendeı, Japonııamen jan-jaqty qatynasty damytý – Qazaqstannyń syrtqy saıasatyndaǵy mańyzdy basymdyqtardyń biri. Bıyl eki el arasynda dıplomatııalyq qatynastyń ornaǵanyna 25 jyl toldy. Osy ýaqyt ishinde Astana men Tokıo bir-birine tyǵyz qoldaý kór­sete otyryp, ortaq maqsattar jolynda senimdi áriptester bolyp keledi.

Májilis Tóraǵasynyń aıtýynsha, ıadrolyq qarýsyzdaný jáne taratpaý, atom energııasyn beıbit maqsatta paıdalaný, basqa da halyqaralyq ózekti máseleler boıynsha bizdiń elderimizdiń ustanymy óte jaqyn. Palata Spıkeri Qazaqstan Prezıdenti Nursultan Nazarbaevtyń ótken jylǵy Japonııaǵa resmı sapary buǵan deıin qol jetkizilgen kelisimderdi bekitip, eki el arasyndaǵy yntymaqtastyqty keńeıtilgen strategııalyq áriptestik deńgeıine jetkizgenin atap ótti.

О́z kezeginde mártebeli meıman Japonııa Qazaqstan Prezıdentiniń ıadrolyq qarýdy taratpaý jónindegi bastamalaryn joǵary baǵalaıtynyn aıta kelip, Prezıdenttiń halyqaralyq deńgeıdegi ózekti máseleler boıynsha mańyzdy qadamdaryna alǵysyn bildirdi.

N.Nyǵmatýlın halyqtyń qo­nys­tanýy jáne damýy máselesi boıynsha parlamentshilerdiń jumysyn yntalandyrý men ilgeriletý boıynsha forýmnyń aýqymdy jumystar at­qaryp kele jatqanyn alǵa tarta kelip, bizdiń depýtattardyń alda­ǵy ýaqytta da HDPAF aıasynda árip­testermen belsendi is-qımyl jasaýǵa daıyn ekendigin bildirdi. Kezdesý barysynda taraptar barlyq baǵyt boıynsha baılanysty tereńdetý jaıyn sóz etip, sonyń ishinde «Nur Otan» parlamenttik fraksııasy já­ne Lıberaldy-demokratııalyq par­tııasy, beıindi komıtetter men yn­tymaqtastyq jónindegi parlament­aralyq toptar arqyly parlament­aralyq áriptestikti nyǵaıtýdyń qajettiligin atap ótti.

Májilis Tóraǵasy jıyn so­ńyn­da K.Takemıdiń sapary bizdiń el­de­rimizdiń ekijaqty qarym-qatynasyn odan ári tereńdetýge yqpal etetinine senim bildirdi.