«Baıqońyr» kınofestıvali osymen ekinshi ret ótkizilip otyr. Festıvaldyń basty maqsaty – jas kınematografısterdiń tyrnaqaldy týyndylaryn kórermenge tanystyrý jáne otandyq qysqametrajdy fılmderdi nasıhattaý.
Festıvaldyń úzdikterin anyqtaýǵa qatysqan qazylar alqasy músheleriniń ishinde Qazaqstan Kınematografıster odaǵynyń tóraǵasy Ahat Ibraev, «Qazaqfılm» kınostýdııasy janyndaǵy «Debıýt» shaǵyn óndiristik birlestiginiń basshysy Anar Qashaǵanova, rejısser Jańabek Jetirýov, qoıýshy-sýretshi О́mirzaq Shmanov jáne basqalary bar.
Eki kúnge sozylǵan «Baıqońyr» qysqa metrajdy fılmder festıvalynyń qorytyndysy boıynsha, tómendegi fılmder top jaryp shyqty. Olar: «Malybaıdaǵy oqıǵa» úshin Turan Mural «Úzdik operator», «Kýb» fılmi úshin Beken Narbaı «Úzdik qoıýshy-sýretshi», – «6 páterdiń» avtory Oljas Ahmetov «Úzdik ssenarıı», Sábıt Ábdiniń «Ǵaısha» fılmi «Úzdik eksperımentaldy fılm», Jaıyq Belqojaevtyń «Men oraldym» fılmi «Úzdik derekti fılm», Toǵjan Baısabaevanyń «Sıqyrly baqshasy» «Úzdik anımasııalyq fılm» bolyp tanyldy. Perızat Madenova «Úzdik aktrısa», Erbolat Erjanov «Úzdik akter» atandy. «Qazylar alqasynyń arnaıy júldesi» Samǵar Raqymnyń «Malybaıdaǵy oqıǵa» fılmine buıyrdy.
Ataýy aıtyp turǵandaı, rýhy bıik, bilimdi bola tura, baspananyń azabyn tartqan eki jas alyp shahardan páter izdep júrip, túrli adamdarmen betpe-bet kelip, shytyrman oqıǵalarǵa tap bolady. Búgingi qoǵamnyń shyndyǵyn tragıkomedııa arqyly jetkizgen rejısser Erbol Boranshynyń «Páter» fılmi Kambodjadaǵy VI-halyqaralyq Chaktomuk qysqametrajdy fılmder festıvaliniń irikteýinen ótip, negizgi baǵdarlamasynda baq synaıdy. Festıval Pnompen qalasynda 25-30 qazan aralyǵynda ótedi.
Aıgúl AHANBAIQYZY, «Egemen Qazaqstan»
ALMATY