Búgin jaqynda ǵana «Álem Barysy» atanǵan, osydan birneshe kún buryn Ashhabadta ótip jatqan Azııa oıyndarynda qazaq kúresinen altynnan alqa taqqan abaılyq ataqty balýan Aıbek Nuǵymarovty oblystyq dene shynyqtyrý jáne sport basqarmasynyń basshysy Asqar Mojanov bastaǵan, Rýslan Seıilhanov syndy tanymal sportshylar qostaǵan, bir top óskemendikter áýejaıdan qarsy aldy.
«Azııa oıyndaryna tuńǵysh ret engen ultymyzdyń tól óneri – qazaq kúresinen ótken dúbirli dodaǵa qatysyp qana qoımaı, altyn júldeger atanǵanyma óte qýanyshtymyn. «Kishi Olımpıada» sanalatyn Azııa oıyndaryna qazaq kúresiniń enýi tarıhı oqıǵa. Ulttyq sportymyzdyń qanshalyqty dárejege kóterilgendiginiń aıǵaǵy. Jarysqa kelsek, qarsylastarymnyń eshqaısysy osal bolǵan joq. Jerebe boıynsha beldestik. Áýeli tájikpen kúrestim, odan keıin jerebe eki túrikmenge qatarynan tústi. Olarmen ótken beldesý men úshin kishkene aýyrlaý boldy. Qansha degenmen óz jerlerinde ótip jatyr ǵoı. Keıbir upaılarymdy eseptemeı qoıǵan tustary da boldy. Biraq men taza jeńiske jettim. Fınalda qyrǵyz balýanymen saıysqa túsip, basymdyǵymdy tanytyp, kók týymyzdy jelbiretip, Ánuranymyzdy áýelettim. Qazan aıynda qazaq kúresinen álem chempıonaty ótedi. Endi sol jarysqa ázirlikti bastaımyn», deıdi Azııa oıyndarynyń chempıony.
Azamat QASYM,
«Egemen Qazaqstan»
О́SKEMEN
Sýretterdi túsirgen
Mánap MURZATAEV