Shymkenttegi destrýktıvti dinı aǵym múshelerine qatysty qylmystyq is qozǵaldy. Bul týraly kúdiktilerdi qamaýǵa alý týraly sanksııa bergen Ál-Farabı aýdandyq sotynyń sýdıasy Ǵanı Baıarystan málimdedi dep habarlaıdy «Egemen.Kz» tilshisi.
Sýdıa toptyń úsh múshesine dinı alaýyzdyqty qozdyrý degen aıyp taǵylǵanyn aıtady.
«Kúdiktilerdiń ishinde Júsipbekov pen Borashovqa qatysty Qylmystyq kodekstiń 174-babynyń 1-bóligi «Jarııa túrde nemese aqparat quraldary arqyly dinı arazdyqty qozdyrý» boıynsha is qozǵaldy. Al úshinshi kúdikti Iztileýov Qylmystyq kodekstiń 174-babynyń 1 jáne 2-bóligimen «Aldyn ala sóz baılasý arqyly dinı alaýyzdyqty qozdyrý», 256-baptyń 1-bóligi «Terrorızmdi nasıhattaý nemese terrorızm aktisin jasaýǵa jarııa túrde shaqyrý» boıynsha aıyp taǵyldy. Olardyń qylmystarynyń ekstremızmge qatysty bolýyna baılanysty qamaýǵa alý týraly sanksııa berildi», - dedi Ǵanı Baıarystan.
Baqtııar TAIJAN,
«Egemen Qazaqstan»
Ońtústik Qazaqstan oblysy