1956 jyly Býdapeshtke keńes áskerleri engizilip, ondaǵy demokratııalyq úderisterdi tas-talqan qylǵan oqıǵaǵa da 55 jyl tolypty. Osyǵan oraı jeksenbi kúni Vengrııa astanasynda myńdaǵan adam mıtıngke shyqty.
Olar keńestik saıasattyń qýyrshaǵy bolǵan sol kezdegi bılikke laǵnet aıtty. Sonymen birge, jınalǵandar eldiń qazirgi bıligine, premer-mınıstr Vıktor Orbannyń saıasatyna da qatty syndar joldady. Sonyń ishinde BAQ-tarǵa senzýra qoıylatynynan bastap, salyq júıesiniń qatańdyǵyna deıin syn tezine alyndy.
ShYNDYQTYŃ BETI AShYLA BASTADY
Nemistiń Der Spiegel basylymy sońǵy ýaqyttarda jarııa bolǵan qupııa qujattarǵa súıene otyryp, KSRO-nyń birinshi jáne sońǵy prezıdenti Mıhaıl Gorbachevtiń shyn beınesin asha tústi. Sonyń ishinde atasynyń baı-kýlak bolyp sottalǵandyǵy sebepti Gorbachevtiń keńestik qurylysty jastaıynan jaqtyrmaıtyndyǵy aıtylǵan.
Qujattarǵa ǵana súıengen eńbekte Gorbachevtiń alkogolge jáne eńbeksiz tabylǵan kiriske qarsy naýqandardyń aıaqsyz qalǵanyna esh shimirikpegendigi, dúkenderdi halyqqa qajetti taýarlarmen toltyrýdy oılaýdyń ornyna, kommýnıstik alyp qurylystarǵa aldanyp ketkendigi jáne t.b. kemshilikteri atap kórsetildi.
BIR AINALDYRǴANDY ShYR AINALDYRDY
Ýkraınanyń Bas prokýratýrasy eks-premer Iýlııa Tımoshenkonyń sońyna shyraq alyp túskendeı. Ol Tımoshenkoǵa qatysty 10 jyl burynǵy jabylǵan isterdi qaıta kóterip, qaraýdy qolǵa alyp otyr.
«Qulan qudyqqa qulasa, qulaǵynda qurbaqa oınaıdy» degendeı, jeti jylǵa bas bostandyǵynan aırylǵan qaıratkerdiń jabylǵan isterin Bas prokýratýra shynshyl bolsa osy ýaqytqa deıin qaramaı, ne bitiripti degen suraq ózinen ózi týyndaıdy. Bular Tımoshenkony bas bostandyǵynan aıyrýǵa narazylyq bildirgen EO, AQSh jáne BUU Bas hatshysy Pan Gı Mýnǵa qyr kórsetken sharalar ekeni anyq.
GREKIIаNY DEFOLTTAN QUTQARSA IGI
Brıýsselde EO elderi lıderleri men qarjy mınıstrleriniń sammıti aıaqtaldy. Onda birshama naqty sharalar júzege asyryldy. Sonyń ishindegi eń bastysy – Grekııaǵa 8 mlrd. eýroǵa teń transhtyń beriletindigi bolyp otyr. Bul qarajat Grekııany qarashada bolýy múmkin defolttan qutqarady.
Sonymen birge, eýropalyqtar qarjylyq qıynshylyqta kómek berý úshin qurylǵan eki qordy biriktirip, onyń aktıvin 940 mlrd. eýroǵa jetkizýdi kózdegen. Osy sammıtte BAQ nazaryn erekshe aýdarǵan máseleniń biri – Fransııa prezıdenti N.Sarkozı men Anglııa premer-mınıstri D.Kemeronnyń sóz qaǵystyrǵandyǵy bolyp otyr.
SÚTTEN AQ, SÝDAN TAZA EMES EKEN
Londonnyń sotynda qaralyp jatqan Reseı olıgarhtary B.Berezovskıı men B.Abramovıchtiń isteri jańa qyrǵa shyqty. Atap aıtqanda, «RýsAl» sekildi Reseıdiń ónerkásip alyptaryn menshikteý barysynda olar uıymdasqan qylmyskerlik toptarmen (UQT) ym-jymdary bir bolǵandyǵy anyqtalyp qaldy.
London soty qolǵa ákelip bergen derekterge ǵana bas shulǵyp qoımaı, iske qatysty dúnıelerdi ózdiginen de tabady eken. Sonyń ishinde Berezovskıı men Abramovıchtiń Parıj áýejaıynda «RýsAl» týraly qupııa áńgimeleri jazylǵan úntaspa tyńdalypty. Onda Berezovskıı seriktesine UQT basshylarymen eki aradaǵy kelissózderin aıtqan eken. Sóıtip, «sútten aq, sýdan taza» bolyp otyrǵan olıgarhtardyń UQT-men baılanysy qapııada aıdaı álemge jarııa bolyp qalypty.
QYSQA QAIYRYP AITQANDA:
Keshe «Bank Moskvy» isi boıynsha eks-mer Iý.Lýjkov sotqa shaqyryldy. Aldynda ǵana D.Medvedevti synaǵan Lýjkov bul soǵan «erýlige qarýly» bolyp otyr, áıtpese banktiń isine esh qatysym joq dep jarııalaǵan.
Parıjde Adam quqyn qorǵaý jónindegi halyqaralyq federasııa «О́zbekstan» atty ınternet-túrme ashýdy kózdeýde. Ol О́zbekstanda qamaýda otyrǵan 13 quqyq qorǵaýshynyń taǵdyryna álem nazaryn aýdarýdy maqsat etpek.
Nıjnıı Novgorod qalasynda 32 jastaǵy áıel bir jastaǵy bóbegin baýyryna qysyp, 16 qabattan sekirip ketken. О́ler aldynda jazyp qaldyrǵan qaǵazynda ómir súrgisi kelmeıtini aıtylypty.
Aýǵanstan sheneýnikteri Ámýdarııa ózeni arqyly ótetin Túrkimenstan, Tájikstan jáne О́zbekstan memleketterimen shekarasyn qaıta qaraý qajet dep otyr. О́ıtkeni, ózen sýy shaıǵandyqtan, halyqaralyq tártip boıynsha mundaı shekaralar 20 jylda bir ret qaıta qaralyp turady eken.
Internet materıaldary negizinde ázirlendi.