Myna bir oqıǵa sheteldik basylymdarda kóp jazyldy jáne kýá bolǵan adamdar áli kúnge deıin umytpaı aıtyp júr. Soǵan qaraǵanda, shynynda da adamdardyń kókeıinde tereń qonaqtaǵan bolsa kerek.
Sonymen... oqıǵany bir-birlep baıandasaq birshama jyldyń aldynda AQSh-tyń Sıetl qalasynda Izgi nıet oıyndary ótip jatady. Dúbirli dodaǵa dúnıejúziniń kóptegen memleketinen myńdaǵan jarymjan, múgedek sportshylar da kelip qatysady.
Álem tarıhynda ekinshi ret ótkizilip otyrǵan atalmysh oıyn 20 shilde kúni bastalyp, 5 tamyzda jalaýyn túsirgenin bilemiz. Oǵan dúnıe júziniń 54 elinen 2600-ge tarta sportshy qatysyp, sporttyń 21 túri boıynsha jeńimpazdar men júldegerlerdi anyqtady. Mundaǵy izgi nıet oıynynyń taǵy bir ereksheligi – mýzykalyq festıvaldar, beıbitshilikti nasıhattaıtyn kórme, konferensııalar qosa uıymdastyrylǵan.
Sodan kezegi kelgende 100 metr qashyqtyqqa júgiretin toǵyz jelaıaq jarys jolyna shyǵady. Bulardyń barlyǵy jarymjan-múgedek. Aıaqtaryna jasandy qural otyrǵyzylǵan... Jarys syzyǵyna jaıǵasqan jigitter tóreshiniń «basta» degen belgisi berilgen sátte, temir aıaqtaryn tarsyldatyp tura júgiredi. Zymyrap keledi desek artyqtaý bolar, shamalarynsha shapshańdyǵyn qosyp, shapqylaıdy.
Jarysqa qatysýshylar joldyń jartysyn júgirip ótip, eptep ekpin ala bastaǵan tusta, artqy jaqtan shar etken daýys shyǵady. Janushyra shyryldaǵan únge eleń etip, aldaǵylar eriksiz artyna burylyp qarasa, bir aıaǵy taıyp qulap jatyr. Kózinde ókinishtiń oty ushqyndaıdy. Qatarynan qalyp barady. Taǵdyrdyń salǵan qıyndyǵy az bolǵandaı, adam qatarly aıaǵyn basyp, aıtýly dodaǵa qatystym-aý degende, jarty jolda súrinip ketkenin qaramaısyz ba. Netken ókinish! Eńkildesin kep.
Taıyp jyǵylyp, zar jylap jatqan beıbaqty muńdastary básekelesteri tastap ketpedi. Bári bir sát toqtap, aınalyp artyna qarady. Temir aıaqtaryn tarsyldatyp, márege qaraı emes, artqa qaraı shapty. Barlyǵy jabylyp kelip jyǵylǵan júırikti qolynan tartyp tik turǵyzdy. Kóziniń jasyn súrtip jubatty. Basynan sıpap baıyrqalady. Toptasyp turyp, ıyq tirestirdi. Birin-biri súıemeldeı qoltyqtasyp, qaz-qatar tizilgen toǵyz júırik jup jazbaı júgirgen kúıi máre syzyǵyn birdeı kesip ótti.
Mundaıda jarys tártibi buzyldy dep, burqyldaıtyn tóreshilerde ún joq. Sonaý tórt qaptalda ıin tiresip, qaıqy oryndyqtarda qasqaıyp, jarysty tamashalap otyrǵan júz myń kórermen bir sát tik turyp, toǵyz jelaıaqtyń izgi nıetine uzaq qol soqty.
Beken QAIRATULY, «Egemen Qazaqstan»