Balalarmen sóılese qalsam, «bolashaqta kim bolǵyń keledi» dep mindetti túrde suraımyn.
Olardyń tap-taza álemi, armandary, «ýaıymdary» maǵan asa qyzyq. Sonda bir baıqaıtynym, baldyrǵandar kóbi ónerge, sportqa qyzyǵady. Ásirese, «sýretshi bolǵym keledi» deıtin jaýaptarǵa oılanyńqyrap qalam. Qandaı qoǵamda da tazalyqqa, móldirlikke, sulýlyqqa ińkárliktiń joıylmaıtynyna, adam balasynyń qarshadaıynan beısanaly túrde sondaı qundylyqtarǵa umtylatynyna dálel bul. Bizdiń keıipkerimiz sol júzdegen shákirttiń qııalyna qanat bitirip júrgen ustaz. Astana qalasyndaǵy №52 mektep-gımnazııada beıneleý óneri páninen sabaq beredi.
Qaırat Jáıirbek tarıhı Otanyna otyzdan asyp baryp oralǵan jigit. О́z pánin asa súıispenshilikpen, jaýapkershilikpen ótkizýdiń syrtynda ol óziniń ónerin de jyldan-jylǵa jetildirip kele jatqan kásibı sýretshi. Oǵan dálel – Astanada, Almatyda ótkizilgen sýret kórmelerine, baıqaýlaryna qatysýy, týyndylarynyń qazylar alqasy tarapynan eleýsiz qalmaýy. Ol 2011 jyly Astanada ótken Dúnıejúzi qazaqtarynyń tórtinshi quryltaıy aıasynda uıymdastyrylǵan kórmege, 2012 jyly Qazaqstan Jastar kongresi uıymdastyrǵan áleýmettik kórmege, 2013-2014 jyldary «Halyqaralyq óner festıvaline» qatysyp, jumystary jaqsy baǵalanǵanyn, 2014-2015 jyldary Astana qalasy bilim basqarmasy uıymdastyrǵan beıneleý óneri muǵalimderiniń shyǵarmashylyq kórmesinde qatarynan eki jyl Gran-prı júldesin ıelengenin aıtady.
Qytaı Halyq Respýblıkasynyń Tarbaǵataı aımaǵy, Dórbiljin aýdanynda týǵan azamat aldymen qytaı tili mamandyǵy boıynsha bilim alǵan. Biraq boıyndaǵy sýretshilik qabilet Qaıratty Ile oblystyq pedagogıkalyq ınstıtýtynyń beıneleý óneri fakýltetine oqýǵa túsýge jeteleıdi. Ol on jyl boıy Dórbiljindegi №2 qazaq orta mektebinde ári qytaı tiliniń, ári beıneleý óneriniń muǵalimi bolyp qyzmet atqarady. Sol jaqta da óneriniń arqasynda jaqsy jetistikterge jetedi.
Onyń týyndylarynyń ishinde jıvopıs te, portret te, grafıka da kezdesedi. Ol sondaı-aq jıyrma jyldan astam ýaqyttan beri ózindegi bardy shákirtterine de úıretýmen, ónerdiń qyr-syryna baýlýmen keledi. Sýretshi tazalyqqa, sulýlyqqa, erkindikke, bastysy, ónerge ǵashyq jandar kóp bolsa dep oılaıdy. Salǵan sýretteriniń de negizgi ıdeıasy sol.
Aıgúl SEIIL, «Egemen Qazaqstan»