Qazirgi ýaqytta qoldanystaǵy normatıvtik-quqyqtyq aktilerge ózgeris engizý máselesi qarastyrylyp jatyr, - dep xabarlaıdy Astana ákimdiginiń medıaortalyǵy.
"Kólik quraldaryna jáne basqa baǵyttardan kele jatqandarǵa, sondaı-aq jaıaý júrginshilerge jol berýmen baǵdarshamnyń qyzyl túsine kóliktiń burylýyna ruqsat etý úshin normatıvti-quqyqtyq aktilerge ózgeris engizý boıynsha másele qarastyrylýda. Bul sheshim kólikterdiń turalap qalý ýaqytyn áldeqaıda tómendetýge kómektesedi", - dedi "Astana qalasy jolaýshylar kóligi basqarmasy" MM basshysy Bekmyrza Igenberdınov.
Sonymen qatar, Astanada kóshe-jol jelisine júktemeni tómendetý jáne qoǵamdyq kóliktiń áleýetin arttyrý boıynsha jobalar ári qaraı jalǵasyn tabatyny aıtylady. Osylaısha BusLane jobasy jalǵasady. Jańa avtobýs jolaqtary aldaǵy ýaqytta Sh. Ýálıxanov jáne S. Seıfýllın kóshelerinde paıda bolady eken.