29-30-qyrkúıek kúnderi Abaı atyndaǵy memlekettik qazaq mýzykalyq drama teatrynda mýzyka klassıgi Iogann Shtraýstyń «Jarqanat» spektakli sahnalandy. Bul – Semeı teatrynyń sahnasynda operetta janrynda qoıylǵan tuńǵysh týyndy .
Iogann Shtraýstyń «Jarqanat» atty operettasy Qazaqstan Respýblıkasynyń eńbek sińirgen qaıratkeri Nurlan Jumanııazovtyń rejısserligimen sahnalandy. Salmaǵy da aýyr, deńgeıi de joǵary klassıkalyq shyǵarmany sahnaǵa shyǵarý ońaı bolǵan joq. Astanadan arnaıy kelgen rejısser bir jarym aı ártistermen qaýyrt jumys jasady. Dese de, Atam teatrynyń ártisteriniń sheberlik qýaty klassıkalyq týyndyny alyp shyqty.
Shyǵarma negizi Genrıh Aızenshteınniń sotta jeńilýinen bastalady. Túrme dırektory Frank Alfredty Aızenshteınniń ornyna qamap, oqıǵa jelisin shıelinistire túsedi. Kezekti oqıǵa barysy Orlovskıı knıazdiń úıinde bolatyn balmaskaradta jalǵasady. Jarqanat kıiminde Rozalında ekenin bilmegen Aızenshteın oǵan ǵashyqtyq sezimin bildiredi. О́z áıeline ózi ǵashyq bolǵan Aızenshteıinniń álegimen oqıǵa sharyqtaı túsedi. Qyzyqty ári tartysty qoıylym sońy bir-biriniń qateligin túsinip, mahabbattary qaıta jańǵyrady. Mahabbat degen uly sezimniń máńgi bolýy, bir-birine degen adaldyq, shynaıylyqtyń nátıjesinde ekendigin avtor óz shyǵarmasynda sóz etedi. Kórermendi kúldire otyryp oı salady.
Mahabbat – adam janynyń asyl qasıeti, yntyq, rııasyz, názik sezimi. Sol kórkem qubylysty álemge tanymal «Jarqanat» atty týyndydan baıqaı alamyz. Rejısser avtordyń aıtpaq negizgi ıdeıasyn alǵa tartyp, kórermenge kóterińki kóńil-kúı syılaıdy.
Spektaklge teatrdyń tolyq akterlyq quram qatysty. Mýzykalyq spektakl bolǵandyqtan, teatrdyń kameralyq orkestriniń eńbegi erekshe ekenin aıta ketken jón. Dırıjer Danııar Seıilhadırovtyń tabandylyǵy, eńbegi ushan-teńiz ekenin spektakl barysynda-aq aıqyn kórindi. Basty rólderdi somdaǵan Bekzat Omashev(Genrıh Aızenshteın ), Ásel Asylbekova (Rozalında) , Azamat Nurǵamys (Falk ) , Jánibek Avlenov (Alfred), Aqerke Rızabekova (Adel ), Dýman Bakımbaev (Blıd ), Myrzahan Sydyqovtardyń (Orlovskıı) tamyljyta salǵan ánderi men ártistik talanttary spektakldiń janyn kirgizip, shyǵarmanyń shyraıyn ashty.
Mereı Qartov,
Abaı atyndaǵy memlekettik qazaq mýzykalyq drama teatry
Ádebıet bóliminiń meńgerýshisi.
Semeı