Keshe Katalonııada táýelsizdik alý jóninde referendým ótken bolatyn. Alaıda, óńir bıligi ıspanııalyq polıseılermen qaqtyǵysta 800 turǵynnyń túrli deńgeıde jaraqat alǵanyn málimdedi. Bul týraly BBC habarlady.
Tártip saqshylary referendýmdy boldyrmas úshin demonstranttarǵa qarsy rezeńkeli oqtar paıdalanǵan. Shamamen 2300 daýys berý ornyn ashý josparlanǵan bolsa, polıseıler onyń 319-yn kúshpen jaýypty.
Jergilikti ýaqyt boıynsha daýys berý 20:00-de aıaqtalýy tıis bolatyn. Biraq qaladaǵy jaǵdaı eskerile otyryp, uıymdastyrýshylar kezekte turǵandarǵa odan keıin de daýys berýge múmkindik berdi.
Resmı túrde daýys berý ýaqyty aıaqtalǵannan keıin Ispanııa premer-mınıstri Marıano Rahoı bul referendýmdy moıyndamaıtynyn, Barselona bıligi qala turǵyndaryn aldap, zańsyz uıymdastyrǵanyn málimdedi.
Ispanııa ishki isteriniń aqpary boıynsha qaqtyǵysta 12 polıseı jaraqat alǵan. Sondaı-aq, el bıligi 92 daýys berý ýchaskesi tártip saqshylarynyń kúshimen jabylǵanyn habarlady. О́z kezeginde Ispanııa premer-mınıstriniń birinshi orynbasary Soraııa Saens Santamarııa baspasóz konferensııasynda tártip saqshylarynyń kúsh qoldanyp, durys qadamǵa barǵanyn jetkizdi.
Qala turǵyndary men polıseıler arasyndaǵy qaqtyǵys jergilikti mektepterdiń birinde oryn alǵan. Belsendiler polısııanyń saılaý bıýlletenderin salatyn jáshikterdiń tárkileýine jol bermeýge tyrysqan.
Osyǵan deıin Ispanııa premer-mınıstri Marıano Rahoı Katalonııanyń táýelsizdik jóninde referendým ótkizýi zańǵa qaıshy dep esepteıtinin eskertken bolatyn. Ispanııa úkimeti Katalonııa turǵyndary 48 saǵat ishinde raıynan qaıtpasa, arnaıy sharalar qoldanatynyn málimdegen. Tıisinshe, Madrıd qalasynan tártip saqtaý jáne zańsyz referendýmdy ótkizbeý maqsatynda óńirge myńdaǵan tártip saqshysy jiberilgen bolatyn.
Katalonııa bıliginiń ókili Jordı Týrýl birneshe mıllıon adam daýys berýge qatysqanyn habarlady. О́ńirdegi 7,5 mıllıon adamnyń 5,3 mıllıony daýys berý quqyǵyna ıe. Al referendým nátıjesi qashan jarııalanatyny belgisiz.
Katalonııa – Ispanııanyń soltústik-shyǵysynda ornalasqan avtonomdy oblys. О́zindik tili, dástúri bar.