Pavlodar oblysynda 980 jańa jumys ornyn qurýǵa múmkindik bergen «Pavlodar» arnaıy ekonomıkalyq aımaǵy jumys isteýde. Mundaı aımaq aýmaqtyń ınfraqurylymyn damytyp, ınvestısııalardy tartýǵa qolaıly jaǵdaı jasaýda. Bul týraly búgin Ortalyq kommýnıkasııalar qyzmetinde ótken óńirdiń áleýmettik-ekonomıkalyq damýyna arnalǵan baspasóz máslıhatynda Pavlodar oblysynyń ákimi Bolat Baqaýov málimdedi.
Ákim sondaı-aq óńirde ındýstrııalandyrý kartasynyń ekinshi besjyldyǵy sheńberinde ınvestısııalar kólemi 1,1 trln teńgeni quraıtyn 35 joba júzege asyrylyp jatqanyn tilge tıek etti. Bul 8412 jumys ornyn qurýǵa múmkindik bermek. Al bıylǵy jyly 1323 jumys ornyn qurýǵa jaǵdaı jasaıtyn 8 jobany iske qosý kózdelip otyr. Olardyń ınvestısııalar kólemi 271,0 mlrd teńgeni quraıdy.
B.Baqaýov sonymen qatar memlekettik baǵdarlamalardy júzege asyrý nátıjesinde kásipkerlerdiń belsendiligi artyp kele jatqanyn atap ótti. «Qazirgi kezde shaǵyn jáne orta bıznes sýbektileriniń sany 6,5 paıyzǵa artty, olar shyǵaratyn ónim kólemi 1,3 esege artty. Jalpy, Bıznestiń jol kartasy baǵdarlamasy boıynsha kásipkerlikti damytý jáne qoldaýǵa 4,2 mlrd teńge bólindi» dedi ákim.
Dınara BITIK,
«Egemen Qazaqstan»