Pavlodar oblysynda «Nurly jer» baǵdarlamasy boıynsha aldaǵy ýaqytta 21 úı qoldanysqa berilip, 2 myńnan astam otbasy jańa páterlerge qonystanady. Bul týraly búgin Ortalyq kommýnıkasııalar qyzmetinde ótken óńirdiń áleýmettik-ekonomıkalyq damýyna arnalǵan baspasóz máslıhatynda Pavlodar oblysynyń ákimi Bolat Baqaýov aıtty.
Ákimniń málimdeýinshe, oblysta salynyp jatqan turǵyn úılerdiń negizgi bóligi «Nurly jer» baǵdarlamasy boıynsha turǵyzylyp jatyr. Sondaı-aq ákim jeke turǵyn úı sektoryn damytý boıynsha da jumys júrgizilip jatqanyn alǵa tartty. Oblysta jeke turǵyn úı qurylysyna arnalǵan aýmaqtar belgilenip, ol jerge ınjenerlik ınfraqurylymdardy tartylyp jatqanyn aıtty. Aǵymdaǵy jyly aýyldardy kóriktendirýge 11 mlrd teńge baǵyttalǵanyn da jetkizdi.
О́ńirdiń áleýmettik-ekonomıkalyq damýyna arnalǵan baspasóz máslıhatynda oblys ákimi bilim salasynyń da jetistikterin aıtyp berdi. Aǵymdaǵy jyly tuńǵysh ret mektepterdiń materıaldyq-tehnıkalyq bazasyn nyǵaıtýǵa 1 mlrd teńge bólindi. Jańa oqý jylyna qaraı 118 bilim berý nysanynda 1,9 mlrd teńgege jóndeý jumystary júrgizildi. Aǵymdaǵy jyly oblystyń barlyq mektepterinde shahmat úıirmeleri ashyldy. Pavlodarlyq oqýshylar respýblıkalyq pán olımpıadalarynda 55 júldeli oryndarǵa ıe bolyp, oblystar arasynda júldeli ekinshi orynǵa turaqtady. Pavlodar oblysy UBT boıynsha da ortasha 91,77 upaımen ekinshi oryndy ıelendi», dedi ákim.
Dınara BITIK,
«Egemen Qazaqstan»