Halyqaralyq qarttar kúni merekesi jáne respýblıkalyq ardagerler uıymynyń qurylǵanyna 30 jyl tolýyna oraı Jarma aýdanynyń ortalyǵy – Qalbataý aýylynda ardagerler úıi saltanatty túrde ashyldy. Qazynaly qarııalardyń ıgiligine berilgen ǵımarattyń ashylý saltanatyna oblystyq ardagerler keńesiniń tóraǵasy Aıtqazy Sherýbaev pen Jarma aýdanynyń ákimi Nurlan Sydyqov qatysty.
«El ıgiligi jolynda uzaq jyldar tynymsyz eńbek etken qarııalarymyz – bizdiń asyl qazynamyz, altyn qorymyz. Elbasynyń «Rýhanı jańǵyrý» baǵdarlamasy ıgi dástúrlerimizdi, rýhanı qundylyqtarymyzdy nasıhattap, jastardy otansúıgishtikke baýlýdy alǵa tartyp otyr. Osy oraıda qoǵamnyń belsendi múshesi retinde Sizderdiń oı-pikirlerińizdiń, aqyl-keńesterińiz ben tájirıbelerińizdiń tárbıelik máni zor», - dedi aýdan ákimi.
Saltanatty shara barysynda N.Sydyqov Jarma óńiriniń damýyna úles qosqan Kabyken Aısaǵojınov, Paızolla Mýsınov, Qyzyrhan Aǵymbaev syndy aqsaqaldarǵa Qurmet gramotalaryn tapsyrdy.
«Sizderdiń tókken ter, etken eńbekterińizdiń jemisin urpaqtaryńyz kórip otyr. Sizderden tálim alǵan óskeleń órender nátıjeli isterińizdi jalǵastyryp, egemen elimizdiń eńsesin tikteı bersin. Aýdan ortalyǵynan Ardagerler úıin ashýǵa qoldaý tanytyp, qamqor bolǵan aýdan ákimine alǵysymyzdy aıtamyz. Aldaǵy ýaqytta Jarma aýdanynyń ardagerler keńesiniń jumysy budan ári jandana túsedi dep senemiz», - dedi shara barysynda sóz alǵan Aıtqazy Sherýbaev.
Oblystyq ardagerler keńesiniń tóraǵasy óz kezeginde aýdandyq ardagerler keńesiniń tóraǵasy Nurlybek Espolov pen Qalbataý aýyldyq okrýginiń ardagerler keńesiniń tóraǵasy Saıası Malǵajdarovty «Ardagerler uıymyna 30 jyl» merekelik medalimen marapattady.
Jańa ǵımaratqa ıe bolǵan ardagerlerdiń qýanyshynda shek joq. «Ardagerler otaýynyń ashylýy uıymnyń jumys aıasyn keńeıtedi. Aǵa býyn ókilderimiz osynda bas qosyp, ýaqyttaryn tıimdi ótkizýmen qatar, túrli taqyrypta pikir almasyp, qoǵam damýyna ózindik úlesin qosatyn bolady», - deıdi Jarma aýdanynyń Qurmetti azamaty Rázııa Sársembaeva.
«Osy ýaqytqa deıin arnaıy ǵımarattyń bolmaýy kóp iske qol baılaý bolyp kelgen edi. Endigi kezekte ózimiz yńǵaıly ýaqytta basqosýlar uıymdastyryp, túrli sharalar ótkizetin bolamyz», - deıdi aýdandyq ardagerler keńesi tóraǵasynyń orynbasary Seıitbek Aqaev.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany