Túrki tildes memleketterdiń yntymaqtastyq keńesin qurý týraly Nahchyvan kelisimine qol qoıylǵan 3 qazan Túrkitildes elderdiń yntymaqtastyq kúni retinde atalyp keledi.
2009 jyldyń 3 qazanynda Ázirbaıjan Respýblıkasynyń Nahchyvan qalasynda ótken Túrkitildes memleketter basshylarynyń IX sammıtinde Qazaqstan Respýblıkasynyń Prezıdenti Nursultan Nazarbaev túrki dúnıesin zertteıtin halyqaralyq ǵylymı ortalyq qurý týraly usynys jasady. Bul kelisimniń qabyldanýy túrki halyqtarynyń birligin nyǵaıtýdy kózdegen aımaqtyq hám elaralyq birlestikti qurýǵa negiz qalady. TMYK uıymyna Qazaqstan, Ázerbaıjan, Qyrǵyzstan jáne Túrkııa múshe. Hatshylyqtyń shtab-páteri Ystambul qalasynda ornalasqan.
Al Túrki tildes memleketterdiń Aqsaqaldar keńesi TMYK aıasynda jumys isteıtin, turaqty túrde áreket etetin konsýltatıvtik-keńesshi ınstıtýt retinde jumys atqaryp keledi. Baýyrlas tórt eldiń erikti túrde qurǵan biregeı halyqaralyq ǵylymı uıymy — «Halyqaralyq Túrki Akademııasy» 2014 jyldyń 28 tamyzynan bastap halyqaralyq mártebege ıe boldy.
Halyqaralyq Túrki Akademııasy qazirge deıin 40-qa tarta ǵylymı-zertteý ınstıtýt, túrkologııalyq ortalyqtarmen baılanys ornatyp, memorandým bekitti. Sonymen birge 100-ge tarta sheteldik belgili túrkolog ǵalymdarmen birigip irgeli jobalardy júzege asyrýda. Halyqaralyq Túrki Akademııasy Túrki keńesi, TúrkPA, TÚRKSOI jáne IýNESKO halyqaralyq uıymymen, sondaı-aq Islam tarıhy, óneri men mádenıetin zertteý ortalyǵymen (IRCICA) de áriptestik ornatty.
Túrki tildes memleketterdiń yntymaqtastyq keńesi taraptar arasyndaǵy ózara senim, dostyq pen tatý kórshilikti nyǵaıtý; óńirde jáne tutas álemde beıbitshilikti qoldaý jáne qaýipsizdik pen senimdi nyǵaıtý; ortaq múdde týdyratyn syrtqy saıası máseleler boıynsha, onyń ishinde halyqaralyq uıymdar sheńberinde jáne halyqaralyq forýmdarda ortaq kózqarasty izdestirý; túrki halyqtarynyń uly mádenı-tarıhı murasyn nasıhattaýda, kópshilikke tanytýda jáne taratýda buqaralyq aqparat quraldary arasyndaǵy ózara is-qımyldy jáne baılanystardy kótermeleý syndy birqatar mindetterdi maqsat etken.
Qazaqstan Respýblıkasynyń Prezıdenti Nursultan Nazarbaev Túrki tildes memleketterdiń yntymaqtastyq keńesiniń ekinshi sammıtinde: "Túrki Akademııasynyń, Mádenı mura qorynyń qurylýy bizdiń jastarymyzdy jaqyndastyrý, ortaq murany zerdeleý úshin tarıh pen tildi birlesip úırenýge degen yqylasymyzdy bildiredi," degen bolatyn .