Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda Qazaqstanda elektrondy bilim berýdi damytý máseleleri qaraldy.
Máselege oraı baıandama jasaǵan Bilim jáne ǵylym mınıstri Erlan Saǵadıev búgingi tańda tujyrymdamalyq túrde bilim berý júıesi negizgi úsh baǵyt boıynsha júrgizilip jatqanyn atap ótti. Olar: bilim berý úderisin sıfrlandyrý, sıfrlyq bilim berý kontenti, bilim berýdi basqarýdy sıfrlandyrý.
Orta bilim berýdegi oqý úderisin avtomattandyrý úshin elektrondy jýrnaldar júıesi paıdalanylýda. Elektrondy jýrnaldardy engizgen mektepterde qaǵaz túrindegisin qoldanýǵa tyıym salynady. Ázirleýshilerdiń pikirinshe, bul qosarlanýshylyqty toqtatady jáne eseptilikti aıtarlyqtaı qysqartady.
Joǵary bilim berýde «Joǵary bilimdi basqarýdyń biryńǵaı júıesi» jumys jasaıdy, ol aqparattyq júıelerdi yqpaldastyrýdyń kómegimen tolyǵady, osylaısha árbir oqýshynyń mártebesi boıynsha ózekti málimetterdi árdaıym kórýge múmkindik beredi. Ǵylym salasynda barlyq ǵylymı granttarǵa ótinim berý, esepter qabyldaý, maqalalardy esepke alý, elektrondy meken-jaılar bazasy sıfrlandyryldy.
Ekinshi baǵyt – sıfrlyq bilim berý kontenti boıynsha mektepter úshin úsh tilde 80 myń beınefılm men ınteraktıvti sabaqtar engizildi, olar muǵalimge sabaqty áldeqaıda joǵary deńgeıde júrgizýge kómektesedi. Bıyl 7 082 mektep atalǵan sıfrlyq resýrstarǵa qoljetimdi boldy.
Atalǵan sıfrly resýrstar onlaın jáne offlaın rejımderde qoljetimdi, ıaǵnı muǵalim – pándi júrgizýshi daıyn beınematerıaldy alyp, ony sabaq barysynda oqý materıalyn túsindirý nemese bekitý úshin paıdalanady. Muǵalimge endi sabaqtarǵa qosymsha materıal izdeýdiń qajeti joq.
Úshinshi baǵyt – bilim berýdi basqarýdy sıfrlandyrý – basqarýdyń biryńǵaı júıesin qurýdy qarastyrady, oǵan barlyq bilim berýdiń málimetter bazalary negizinde Big Data qurý engiziledi.
«Osyǵan baılanysty 2017 jyldyń sońyna deıin mınıstrlik vedomstvoishilik bilim berýdiń málimetter bazalaryn yqpaldastyrýdy josparlaıdy, al 2018 jyly bizdiń málimetterdi memlekettik organdardyń málimetter bazalarymen yqpaldastyrý josparlanǵan», dedi E. Saǵadıev.
Dınara BITIK, «Egemen Qazaqstan»