Oqyrman haty
Qadamdaryńyz quptarlyq
Men baspasózdiń kóptegen salasynda eńbek etken qart jýrnalıspin. Bir kezderi ótkir syn jazatyn qarymyma qaraı sizderdiń gazetterińizge shaqyrylyp, shama-sharqymsha kóp jyl eńbek etken janmyn.
Kópti kórgen aǵa retinde birer pikirimdi bildireıin. Sońǵy kezderi «Egemende» qyzyqty, aıtary bar habarlar kóbeıdi. Quptarlyq, tanymdyq maqalalar jıi shyǵyp jatyr. Bir ǵana mysal, osy jylǵy 14 shildedegi «Máńgilik ómir joqshysy» atty maqalany oqyp shyǵyp, rıza bolǵanym sonshalyq, oblystyq gazet basshylaryna kóshirip basýlaryn aıtyp qulaǵdar ettim. Osy tektes maqalalardyń jıirek shyǵýyna tilektespin. О́zim satıranyń joqshysy bolǵandyqtan, bir kezderi jetisine shyǵyp turǵan «Sóz soıyl» ázil-ospaq otaýyn ótkirleý etip jıirek berip tursańyzdar eken degen tilegimdi bildiremin. Bul qalyń oqyrman oıy. Al tanymdyq materıaldardy jıirek berip tursańyzdar óte ıgilikti is bolar edi. Qadamdaryńyz quptarlyq, áli de el kúter mazmundy da maǵynaly materıaldar beriletinine senimdimin.
О́tegen JAPPARHAN
Qyzylorda
Qorǵalatyn eskertkishter tizimine ense
Qazaq jerinde nebir aıtýly eskertkishter bar. Ony táýelsizdikten keıin tanyp-bilip otyrmyz. Ultymyzdyń uıytqysyna aınalǵan Ulytaý óńirindegi tarıhı-arhıtektýralyq eskertkishter qazir zerttelýde. Onyń ústine Elbasy Nursultan Nazarbaevtyń 2014 jyldyń tamyz aıyndaǵy «Ulytaý tórindegi tolǵanys» atty suhbaty jurttyń sanasyna oı tastap, serpilis týǵyzdy. Ata-babalarymyzdan qalǵan tarıhı jádigerlerdi qaıta jańǵyrtý isine de jumyldyrdy.
Osy arada myna bir pikirimizdi bildirsek deımiz, ol – Ulytaý óńiriniń Terisaqqan aýylyndaǵy Jánibek qajy Egizekuly mazary týraly edi. Bul mazar ótken ǵasyrdyń basynda turǵyzylǵan. Qazirgi jaı-kúıi jaman emes. Degenmen qorǵaýdy qajet etip tur. Bul mazardy memleket qamqorlyǵyna alý jóninde «Ulytaý» ulttyq tarıhı-mádenı jáne tabıǵı qoryq murajaıy» respýblıkalyq memlekettik qazynalyq kásipornynyń basshysy osy jyldyń basynda «Tarıhı-mádenı murany saqtaý ortalyǵy» KMQK mekemesine arnaıy hat da joldaǵan edi. Biz osy tarıhı qundylyqty saqtaı otyryp keıingi urpaqqa shyraıyn buzbaı jetkizý boıynsha pikirimizdi bildirgendi jón kórdik.
Jánibek dinı bilimimen qatar, elge uıytqy bolǵan abyz, sózge sheshen alǵyr adam bolǵan eken. Endeshe osyndaı el adamynyń mazaryn eskerýsiz qaldyrmaı qorǵaýǵa alsaq jón bolar edi.
Shoqan OSPANBEKOV,
eńbek ardageri, Ulytaý aýdanynyń qurmetti azamaty
Qaraǵandy oblysy
Qaraly úıge qaraılasqan qazaqpyz
«Bireýdiń kisisi ólse qaraly – ol, qaza kórgen júregi jaraly – ol» deıdi Abaı atamyz. «Tas túsken jerine aýyr» deıdi halyq danalyǵy. Jaqynda ǵana Almaty oblysy, Alakól aýdany, Yntaly aýylynyń 38 jasar turǵyny Rysbek Buǵyseluly júrek talmasynan qaıtys bolǵan.
Qolynda kári anasy bar, taban et, mańdaı terimen eńbek etip, úlken bir shańyraqty asyrap otyrǵan arystaı azamatqa aıaq astynan kelgen qaza, árıne aýylymyzǵa, ásirese marqumnyń otbasy, týys-týǵandaryna ońaı tıgen joq. Topyraqty ólim shyqqan otbasyna taıly-tuıaǵy qalmaı jınalyp sharýasyna kómektesip, kóńil járdem, qol járdemin aıamaıtyn aýyl adamdary bul joly da jolynan jańylǵan joq. Egin egý, jer jyrtý jumysy kezinde Mádenbek, Bulǵynbek, Muqııat bastaǵan aýyl turǵyndary bas bolyp temir tehnıkany eń aldymen Rysbek marqumnyń jerine salyp, 30-dan asa adam men 20 shaqty tehnıkanyń kúshi jumyldyrylyp, tuqymyn seýip berdi. «Tirliktiń dıirmenin birlik tartady» degen osy. Jylaǵandy jubatyp, jyǵylǵandy súıeıtin ata dástúr, ardaqty saltymyz. Qashanda úlkenge qurmet, kishige izet jasap júretin aq kóńil, ashyq jarqyn azamattyń aǵaıyn týysynyń basyna túsken qara taýdaı qaıǵysyn bólisip, tirligine septesken bul qaıyrymdylyq shara, saýapty isteri kópke úlgi bolsa kerek.
Qadyrsultan NÚSIPQAN
Almaty oblysy
Qalamger bolǵym keledi
Mektep meni bolashaǵyna nyq qadam jasaıtyn azamat etip ázirledi. Senimderin aqtap, bilim keńistigine qanat qaqsam degen asqaq armanym bar. Kemeńgerligi kemel halqymnyń dara minezin tanytatyn qalamger bolǵym keledi. Jastardy rýhanı tazalyqqa, adamgershilikke úndeıtin dúnıeler jazyp, zaman júgin kóteriskim keledi. Sózimizge, ózimizge, isimizge muqııat qaraıtyn ýaqyt keldi. Aspannan nápaqa túspeıdi, kimde bilim-bilik – sol elde basymdyq, sol el kúshti, qýatty. Mádenıetimizge muqııat qarap, umytqandy izdep, kónergendi túzep, qolda bardy jarqyratatyn ǵasyrda ómir súrýdemiz.
Úlkenderdiń áńgimesine qulaq qoıyp, ult zııalylarynyń murasyna qurmetpen qarap, sylbyr izime jan bitirgim kelip turatyn ójettik bar mende. Ǵalamtor zamany basymdyqqa ıe bolyp turǵan kezeńde men sekildi jastardy qaýip-qaterden saqtandyryp qalam terbeıtin jýrnalıstıka meni belgisiz kúshimen qyzyqtyryp alyp bara jatady. Men de qazaqqa tán bııazylyqty, ótkenge salaýat, bergenge qanaǵat, qysylǵanda qol ushyn berer qasıetti ereksheligimizdi, jalpy qanat jaıǵan qazaq eli jaıly tuǵyrly tolǵanystarymdy jazatyn bolamyn. Teńdesiz beıneli, qýatty Abaı tilin meńgergen ultjandy qalamymmen tóltýma mádenıetimdi nasıhattaımyn.
Janerke HALIÝLLINA,
D.Baıbosynov atyndaǵy №13 mektep- gımnazııasynyń 11-synyp oqýshysy
Atyraý
Zamanaýı qasaphana ashyldy
Aqmola oblysy, Atbasar aýdanyndaǵy Sochınsk aýylynda ashylǵan qasaphana qazirgi zamanǵa saı bolyp otyr. Ol kásiporyn iri qara men qoı soıýǵa arnalǵan. Qasaphana reseıdiń «TD «MILAM» ashyq aksıonerlik qoǵamynyń zamanaýı qondyrǵylarymen jabdyqtalǵan. «Sochınsk» JShS tapsyrysy boıynsha salynǵan keshen maldy soıatyn alań, shujyq shyǵaratyn seh jáne tońazytqysh tárizdi jeti bólikten turady.
«Reseılik kompanııanyń kómegimen zaman talabyna saı, joǵary sapaly et jáne shujyq ónimderin tereń óńdeıtin qasaphana ashyp otyrmyz. Endi óz malymyzdy (sharýashylyqta 300 bas iri qara bar) ózimizde soıyp, etin óńdeı alamyz. Oǵan qosa, óńirdegi mal ósirýmen aınalysatyn sharýashylyqtarǵa da qyzmet kórsetetin bolamyz», deıdi «Sochınskoe» JShS bas ınjeneri Oleg Bovdýev.
Aslan OSPANOV
Aqmola oblysy