Búginde kásipkerler, tabysty sheneýnikter meshit salyp jatsa tańdanbaıtyn boldyq, shúkirshilik. Al Memlekettik syılyqtyń laýreaty, áıgili sýretshi Erbolat Tólepbaıdyń týǵan aýylyna jańa meshit salyp berýi eldi eleń etkizdi.
Qazaq beıneleý óneri salasyndaǵy shoqtyǵy bıik dara tulǵa KSRO Sýretshiler odaǵyna múshe 17 qylqalam sheberi shyqqan Ońtústik Qazaqstan oblysy Tóle bı aýdanyna qarasty Qasqasý óńirinde týyp-ósken. Sol 17 sańlaqtyń kóshin bastap, baby kelisýine, baǵy janýyna barynsha atsalysqan dańqty sýretshi Toqbolat Toǵysbaev pen Erbolat Toǵysbaıuly bir otbasynda ósken aǵaly-inili ekenin kózi qaraqty qaýym jaqsy biledi. Aýyldaǵy jańa meshittiń ashylý saltanatyna jınalǵan qaýym Alla úıiniń ishki-syrtqy kelbeti erekshe ekenin aıtyp, týǵan jerine qamqorlyq jasap júrgen qylqalam sheberine rızashylyqtaryn bildirýde.
Tasaryq aýylynda boı kótergen meshitke Erbolat Toǵysbaıulynyń anasy Uldar esimi berildi. Uldar apa jurtshylyqqa syıly emshi adam bolǵan. Sýretshi baspasózge bergen suhbattarynyń birinde anasynyń aldyna emdelý úshin adamdar aǵylyp kelip jatatynyn aıtqan bolatyn. «Beıtanys jandardyń taǵdyry da ártúrli edi. Olardyń áńgimesin bala kezden estip óskendikten bolar, ómir týraly kózqarasym erte qalyptasty. Bul keıin shyǵarmashylyǵyma da áser etti», – deıdi sýretshi. Sondaı-aq anasynyń: «Myna ómir shynymen beskúndik eken. Alǵashqy kúnim – ińgálap jaryq dúnıege kelgenim, ekinshi kúnim – boıjetip, etek-jeńimdi jınaǵanym, úshinshi kúnim – turmysqa shyqqanym, tórtinshi kúnim – perzent súıgenim, besinshi kúnim – mine, osy, óler shaǵym eken. Sondyqtan ómir súrgen árbir kúnińniń qadirin bil, balam! Ýaqytyńdy baǵala!» degen ósıeti sanasynda jattalyp qalǵanyn aıtqan bolatyn. Meshitke esimin berý qylqalam sheberiniń anaǵa kórsetken qurmetin, taǵzymyn bildirse kerek. Alla úıiniń ashylý saltanaty da ózgesheleý ótti. Maqtaý, madaqtaýdy qalamaǵan Erbolat Toǵysbaıuly meshittiń ashylý saltanatynda aýyldastary alǵys retinde daıyndap qoıǵan sándi shapandy kııýden de, aýyzdyǵymen alysqan aqboz atqa minýden de bas tartty. О́negeli isti maqtaý estip, at miný úshin jasamaǵanyn osylaısha ańǵartty. Úlgi kórsetti. Meshittiń ashylýynda sóz alǵan Qazaqstan Musylmandary Dinı basqaramasynyń Ońtústik Qazaqstan oblysy boıynsha ókil ımamy Ahmetjan Kerimbekov ıslam tarıhynda meshit salý – barsha paıǵambarlar shuǵyldanǵan qadirli is bolǵanyn atap ótti. «Meshit salý úlken saýap, úlken jaýapkershilik. Endigi úlken jaýapkershilik – eldi ımandylyqqa, aýyzbirshilikke baýlıtyn ár-alýan is-sharalar ótkizý, jamaǵattyń meshitke kóptep kelýi», – dedi Ahmetjan qajy. Al Ońtústik Qazaqstan oblysynyń qurmetti azamaty Nurmaǵanbet Ájimetov bata berdi. Sóıtip, ashylý rásimi tez aıaqtaldy. Áıtpese, sóz beriletinine kúmándanbaı, sýretshige madaq sózin daıyndap turǵandar kóp edi.
Belgili ǵalym Myrzataı Joldasbekov «qazaq halqynyń pasportyna aınalǵan azamat» degen baǵa bergen Erbolat Tólepbaı osy bir ıgi isimen de Elbasy bastamasyna qoldaý bildirdi. Strategııalyq mańyzǵa ıe «Bolashaqqa baǵdar: rýhanı jańǵyrý» maqalasynda Memleket basshysy: «Týǵan jerge, onyń mádenıeti men salt-dástúrlerine aıryqsha ińkárlikpen atsalysý – shynaıy patrıotızmniń mańyzdy kórinisteriniń biri» ekenin aıtqan bolatyn. Týǵan jerlerin umytpaı, oǵan qamqorlyq jasaǵysy kelgenderdi qoldaý kerektigi de baǵdarlamalyq maqalada aıtyldy. Jasampaz halqymyzdyń jarqyn bolashaǵyn aıqyndaǵan maqalada taıaý jyldardaǵy mindetter retinde aıqyndalǵan bastamalar búginde júzege asyryla bastady. Bul oraıda, aýyldyń ajaryn asha túsken jańa meshit el ıgiligine qyzmet etip, urpaq tárbıesine paıdasyn tıgizetini, qoǵamdaǵy izgilik pen jaqsylyqtyń órken jaıýyna úles qosatyndyǵy anyq.
Alys-jaqyn shet memleketter, Eýropa elderine deıin talantynyń myqtylyǵyn moıyndaıtyn Erbolat Tólepbaı aýylyndaǵy mekteptiń jóndeýden ótýine de qol ushyn sozyp, úzdik oqıtyn shákirtterge arnaıy stıpendııa taǵaıyndaǵany taǵy bar.
Ǵalymjan ELShIBAI,
«Egemen Qazaqstan»