Bıylǵy qyrkúıektiń qazanǵa ulasar shaǵy respýblıkanyń batys turǵyndary úshin túsiniksizdeý bolyp turǵandaı. Bulaı bolatyn sebebi ótken aıdyń ishinde kúnniń qyzýy 30 gradýsqa deıin kóterilip, beınebir sýǵa shomylý naýqany qaıta oralǵandaı sát týdy.
Adamdar qala kóshelerinde qysqa jeń kóılekpen terlep-tepship júrdi. Mine, bul meızamshýaq desti halyq kúntizbesinen túsinigi bar kónekóz turǵyndar. Alaıda arada bir kún ótkende aýa-raıy kúrt ózgerip, kún salqyndap sala berdi.
Keshegi bir kúnderi Aqtóbe aýmaǵynda aýanyń temperatýrasy mınýsty kórsetip, alǵashqyda qylamyqtap túsken qar kóp uzamaı japalaqtap jaýa bastady. Sol túnde Oral – Astana poıyzynda otyryp, jol saparǵa shyqqan kezimizde mezgilinen erte túsken qardyń Aqtóbeniń Batys Qazaqstan oblysyndaǵy Shyńǵyrlaý jerine deıingi aralyǵyna jaýǵandyǵyna kýá boldyq. Aqtóbe qalasynda aq ulpa qar-japyraqtary áli jap-jasyl tal-terekterdiń sabaqtaryna qonaqtap kaldy. Qar jaýǵan sátte úp etken jel joq, tymyq bolǵany da osyndaı ádemi de, tosyn kórinistiń oryn alýyna sebepshi bolǵan sekildi.
Jalpy qyrkúıektiń aıaǵynda qar túsýi tabıǵattyń tosyn qubylysy. Sondaı-aq osy kezde aýa-raıynyń nólden tómen salqyndyqty kórsetýi de sırek kezdesetin jaǵdaı. Osyǵan oraı Aqtóbe jáne Batys Qazaqstan oblystarynda bıylǵy jylytý maýsymy ádettegi merzimnen eki apta ilgeri jyljytyldy. Bul álde ınternet kózderin sharlap ketkendeı 100 jyldyń ishinde bolyp kórmegen alda kele jatqan qatal qystyń habarshysy ma eken? Áıtse de osymen qys erte túsedi dep joramal jasaýdyń da qısyny joq sekildi. О́ıtkeni sınoptık mamandar aldaǵy kúnderi Aqtóbe aýmaǵynda aýa-raıy kúndiz qaıtadan 16-18 gradýsqa deıin kúrt joǵarylaıtynyn málimdep otyr.
Temir QUSAIYN, «Egemen Qazaqstan»
Aqtóbe