Pavlodar oblysynda 455 túrli mamandyq boıynsha 3,5 myńǵa jýyq bos jumys oryny bar. Onyń 1 myńǵa jýyǵy aýyldyq aımaqtarda. Bul týraly keshe oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Merýert Esembaeva «Serpin-2050» baǵdarlamasymen kelgen jastarmen kezdesý barysynda aıtty.
- Bizge jetispeıtin mamandyqtardyń kóbi bilim berý, densaýlyq saqtaý jáne aýyl sharýashylyǵy salalary boıynsha bolyp otyr, - deıdi Merýert Seıitbekqyzy.
- Mine, osyndaǵy maman tapshylyǵyn jabý maqsatynda byltyr úkimet tarapynan «Nátıjeli jumyspen qamtýdy úılestirý jáne jappaı kásipkerlikti damytýdyń 2017-2021 jyldarǵa arlanǵa memlekettik baǵdarlamasy» qabyldanǵan. Maqsaty - elimizdiń jumys kúshi tapshy óńirlerin qajetti mamandarmen qamtamasyz etý jáne óz erkimen qonys aýdarýǵa járdemdesý. Oǵan qazaqstan respýblıkasynyń azamattary men shetten kelgen qandastarymyz qatysa alady. Naqtyraq aıtqanda, bıyl Pavlodar oblysyna basqa oblystardan qonys aýdarýshylardy qabyldaý úshin 50 otbasyna óńirlik kvota berilgen bolsa, oralmandardy qabyldaý úshin 100 otbasyna qarajat bólindi. Bıyl bizdiń óńirge basqa oblystardan 50 otbasy kóship kelip ózderine tıesili jeńildikterin alǵan, ıaǵnı, ishki kóshi-qonǵa berilgen qarajat tolyqtaı ıgerildi. Sonymen qatar, taǵy 20 otbasy kezekte tur. Olardyń máselesi keler jylǵy bıýdjetpen sheshilmek. Mamandardyń sózinshe, kelesi jyly 450 otbasyn, 1800-ge jýyq adamdy qabyldaýǵa úkimetke usynys jasalǵan. Sonymen qatar, «Serpin» baǵdarlamasyn negizge ala otyryp, jalǵyzbasty mamandarǵa da qoldaý kórsetý qarastyrylýda.
- Bizdiń mamandar ótken aıdyń sońynda aýyldyq jerlerde ornalasqan 178 jumys berýshimen kezdesken bolatyn. Sonyń nátıjesinde 490 jumys oryny bos turǵany belgili boldy. Onyń 158-i naqty mamandyq ıeleri bolyp tabyldy. Mundaı qyzmetkerlerge baspana beriledi. Sondyqtan sizder erteń oqýlaryńyzdy bitirgen soń jumysqa ornalasyp, bizdiń óńirdi túbegeıli mekendep qalýlaryńyzǵa ábden bolady. Ásirese, aýyldyq jerlerge barǵan jas mamandarǵa baspanaly bolýǵa múmkindik zor, - dep atap ótti Merýert Esembaeva.