Seksen alty jyldyq tarıhy bar oblystyq «Ortalyq Qazaqstan» gazetinde ár jyl saıyn basylymnyń týǵan kúnine oraı «Balbóbek» arnaıy betiniń kishkentaı oqyrmandaryn, jas tilshilerin marapattaıtyn dástúr saqtalǵan. Iаǵnı, atalmysh betke óziniń qalamynan shyqqan týyndylaryn jarııalaǵan jas oqyrmandar gazettiń týǵan kúninde redaksııaǵa arnaıy shaqyrylyp, estelik syılyqtarmen marapattalady.
«Balbóbektiń» de ózindik tarıhy bar. Qarymdy qalamger, daryndy jýrnalıst, kezinde «Ortalyq Qazaqstan» gazetiniń redaktory qyzmetin atqarǵan Rymqul Súılemenov tusaýyn kesken osy arnaıy bet áli kúnge jalǵasyn taýyp keledi.
Bıyl da ujymnyń uıymdastyrýymen bir top jas tilshiler gazettiń týǵan kúni qarsańynda radaksııaǵa arnaıy shaqyryldy. Atap aıtar bolsaq, Qarqaraly aýdany, №3 Yntaly mektebiniń oqýshysy Shalqar Cúleımenov, Balqash qalasy, S.Seıfýllın atyndaǵy №7 mektep-gımnazııasynyń «Káýsar» ortalyǵynyń jas tilshisi Ánýar Iskakov, Qaraǵandy qalasyndaǵy №53 mektep-lıseıiniń oqýshysy Farıza Qurmanǵalıeva, Aqtoǵaı aýdany, K.Baıseıitova atyndaǵy mektep oqýshysy Ámıná Zeken, Shet aýdany, Iý.Gagarın atyndaǵy mektep oqýshysy Aısanym Qaıratova, Jańaarqa aýdany, B.Amalbekov atyndaǵy mektep oqýshysy Mádı Pazyl, Buqar jyraý aýdany, Kókpekti orta mektebiniń oqýshysy Dılnaz Jańbyrbaeva, Osakarov aýdany, №1 qazaq orta mektebiniń oqýshysy Aqbota Ábdýova, Qaraǵandy qalasy, №77 mektep oqýshysy Erkejan Saǵyntaı arnaıy dıplommen marapattalyp, «Balbóbektiń» estelik syılyǵyna ıe boldy. Sonymen qatar gazet janashyry jáne urpaq tárbıeshisi bolǵany úshin búldirshinderdiń ustazdary da alǵys hattarmen marapattaldy.
Basylym basshysy Maǵaýııa Sembaı jas tilshilerge ultynyń joǵyn joqtar, abyroıyn asqaqtatar azamattary bolýyna tilegin bildirdi.
Mıras ASAN,
«Egemen Qazaqstan»
Qaraǵandy oblysy