Búgin Glýbokoe aýdanynyń ortalyǵy – Glýbokoe aýylynda muǵalimder kúni merekesi atalyp ótip, óńirdiń úzdik ustazdaryna qurmet kórsetildi.
Saltanatty sharada sóz alǵan aýdan ákiminiń orynbasary Radjan Seıitqanov aýdanda bilim salasyna aıryqsha kóńil bólinip otyrǵanyn atap ótti. Onyń aıtýynsha, bıyl aýdannyń bilim salasyna 4 mıllıard teńgege jýyq qarjy bólinip, 20 mektep mýltımedııalyq qural-jabdyqtarǵa qol jetkizipti. Mektepke baratyn oqýshylar sany da ulǵaıyp, bıyl 7 myńǵa jetip jyǵylypty. О́ńirdegi myńǵa tarta muǵalimniń 806-sy joǵary kásibı bilimge ıe bolsa, 180-i joǵary sanatty, 289-y birinshi sanatty ustazdar eken. Osyndaı derekterdi alǵa tartqan R.Seıitqanov Ývarov orta mektebiniń dırektory Lıka Boztaevaǵa, O.Bókeı atyndaǵy qazaq orta mektebiniń dırektory Sáýle Dosqalıevaǵa jáne Cheremshanka orta mektebiniń dırektory Tatıana Korıakovaǵa aýdan ákiminiń gramotasyn saltanatty túrde tabys etti. Sonymen qatar bul kúni ózge de úzdik muǵalimderge aýdan ákiminiń gramotasy men oblystyq bilim jáne ǵylym qyzmetkerleri kásipodaǵy uıymynyń arnaıy tósbelgileri tapsyryldy.
Azamat QASYM,
«Egemen Qazaqstan»
Shyǵys Qazaqstan oblysy,
Glýbokoe aýdany
Sýretterdi túsirgen avtor