«Eldiń damýy onyń bilim berý júıesi arqyly baǵalanatyn bolady», degen Elbasynyń sózi jaıdan-jaı aıtylmasa kerek-ti. Sebebi memlekettiń mereıin ósirip, mártebesin arttyratyn adam bolsa, sol adamdy maman qylyp shyǵaratyn, shynyqtyratyn mektep. Bilim men tárbıeniń tal besigi.
Osy besikti terbetip, aqylyn aıamaıtyn, shákirtin aıalaıtyn ustazdar desek jalǵan bolmas. Kúni keshe elordanyń tórinde eńbegi elengen úzdik ustazdardy Bilim jáne ǵylym mınıstri Erlan Saǵadıev marapattady.
Ultqa maqtanysh, ujymǵa syıly bolyp, ulaǵatty urpaq tárbıeleýde talmaı talpynyp júrgen ustazdar qaýymyn marapattaý rásiminde mınıstrdiń ózi de aqtaryla sóılep, aǵynan jaryldy.
«Qaı zamanda bolsyn, ustazdarǵa qurmet joǵary bolǵan. Ustazǵa qurmet kórsetý – bilimge qurmet kórsetý. Jaqsy ustazǵa kezigip, tálim-tárbıe alǵan shákirt ómir maıdanynda moıymaı kúresip, bolashaq joldarda baǵytynan taımasy anyq. Biz qazirgi ýaqytta jańartylǵan bilim mazmunyna kezeń-kezeńmen kóshýdemiz. Bul oraıda muǵalimderdiń atqarar róli orasan zor. Sondyqtan sizderge sarqylmas kúsh-jiger tileımin», dedi Erlan Saǵadıev.
Aıta ketetin taǵy bir jaıt, Bilim jáne ǵylym mınıstrligi aǵymdaǵy jylǵy 26 qyrkúıek-4 qazan aralyǵynda muǵalimniń qoǵamdaǵy ımıdjin qalyptastyrý, pedagog mártebesin arttyrý, moraldyq-materıaldyq yntalandyrý maqsatynda bilim berý uıymdarynda, aýdandyq bilim bólimderinde, oblystyq bilim basqarmalarynda túrli sharalar uıymdastyrǵan. Sonyń nátıjesinde jyl saıynǵy «Úzdik pedagog» respýblıkalyq konkýrsy jeńimpazdary anyqtalǵan. Atalǵan konkýrs 2012 jyldan bastap ótkizilip kele jatyr.
Elimizdiń eń úzdik pedagogterin anyqtaǵan konkýrsqa respýblıkamyzdyń barlyq óńirlerinen mektepke deıingi jáne orta bilim salasynda qyzmet etip júrgen 112 ustaz, sondaı-aq tehnıkalyq jáne kásiptik bilim salasynyń 44 ınjenerlik-pedagogıkalyq mamany qatysqan. Al keshegi saltanatty merekede 64 jeńimpazǵa «2017 jyldyń úzdik pedagogi» tós belgisi, kýálik jáne 1000 AEK mólsherinde syıaqy tabys etildi.
Sonymen qatar bilim salasynyń damýyna zor úles qosqan elimizdiń 20 ustazy arnaıy alǵys hattarmen marapattaldy.
Raýan QAIDAR, «Egemen Qazaqstan»