Búgin Qazaqstan halqy Assambleıasy men Ońtústik Qazaqstan oblysy ákimdiginiń uıymdastyrýymen Shymkent qalasyndaǵy «Qazaqstan halqy Assambleıasy» ǵımaratynda «Qoǵamdy jańǵyrtýdaǵy medıasııanyń róli» taqyrybynda respýblıkalyq dıspýt-forým ótti.
Jıynǵa qatysqan OQO ákimi Janseıit Túımebaev forýmnyń halyqaralyq formatta ulttyq qundylyqtardyń qaınary bolǵan Ońtústik Qazaqstan oblysynda ótkizilip otyrǵandyǵyn úlken jetistikke balady.
«Memleket basshysy Nursultan Ábishuly Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda kóneniń kózindeı bolǵan ulttyq qundylyqtardy zaman aǵymyna saı qaıta túletýdi mindettegen edi. Medıasııa baıaǵy «Jeti jarǵynyń» búgingi jalǵasy retinde halyqtyń baıyrǵy mámilegershilik dástúrin jalǵastyryp otyr. Ol sondaı-aq, daýlasýshy taraptardy ózara kelisimge keltirip, ortaq paıym jasaýǵa jeteleıdi», - dedi Janseıit Qanseıituly.
Respýblıkalyq forýmǵa QR Prezıdenti ákimshiligi QHA hatshylyǵynyń meńgerýshisi Darhan Myńbaı, QR «Atameken» Ulttyq kásipkerler palatasynyń Basqarma tóraǵasy Abylaı Myrzahmetov, QR Parlamenti Májilisiniń depýtattary, QR Joǵarǵy Sotynyń sýdıalary, QR Bas prokýratýrasynyń, QR Bilim jáne ǵylym mınıstrliginiń, QR Prezıdenti janyndaǵy «Qoǵamdyq kelisim» RMM-niń ókilderi, QHA janyndaǵy Medıasııa keńesiniń músheleri, barlyq oblystardaǵy medıasııa ortalyqtarynyń jetekshileri men «Qoǵamdyq kelisim» KMM-niń janyndaǵy medıasııa kabınetteri meńgerýshileri qatysty.
Is-shara Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy ulttyq birgeılikti saqtaýdy, 2011 jyly qabyldanǵan QR «Medıasııa týraly» Zańynyń oryndalýyn saralap, aldaǵy mindetterdi belgileýdi, bitimgershilikke negizdelgen halqymyzdyń dástúrli bıler taǵylymymen sabaqtasyp jatqan búgingi medıasııa jelisin damytýdy, qoǵamdyq kelisim men jalpyulttyq birlik salasyndaǵy memlekettik saıasatty paıymdy parasattylyqpen iske asyrýdy kózdeıdi.
Forýmda Qazaqstan halqy Assambleıasy tóraǵasynyń orynbasary Darhan Myńbaı baıandama jasady. Sondaı aq, QR Parlamenti Májilisiniń depýtaty B.Ábdiraıymnyń, QR Sýdıalar Odaǵynyń tóraǵasy E.Alımbekovtyń, QR Bas prokýrorynyń aǵa kómekshisi M.Tursynbekovanyń jáne Shyǵys Qazaqstan oblystyq «Qoǵamdyq kelisim» KMM basshysy E.Tóleýbekovtyń, Ońtústik Qazaqstan oblystyq «Qoǵamdyq kelisim» KMM basshysy E.Baıqonaqovtyń, Mańǵystaý oblystyq «Qoǵamdyq kelisim» KMM basshysy S.Satalıevanyń, Saıram aýdanyndaǵy kásibı emes medıator S.Iýsanovtyń habarlamalary tyńdaldy.
Forým aıasynda QHA janyndaǵy Medıasııa keńesi men Ońtústik Qazaqstan oblysy ákimdiginiń, QHA janyndaǵy Medıasııa keńesi men «Atameken» Ulttyq kásipkerler palatasynyń ózara yntymaqtastyq týraly memorandýmǵa qol qoıyldy.
Aıta keterligi, Elbasy Qazaqstan halqy Assambleıasynyń XXIV sessııasynda medıasııa jelisin damytýdy assambleıaǵa júktegen bolatyn. Bul baǵytta QHA janynda Medıasııa keńesi qurylyp, óńirlerdegi Dostyq úılerinde 17 medıasııa kabınetteri ashyldy. Elimizde qyzmet etetin 640 kásibı, 3583 kásibı emes medıatorlardyń derekqory jasaldy. QHA men QR Joǵarǵy Sotynyń arasynda túzilgen ózara yntymaqtastyq týraly memorandým aıasynda 2017 jyly arnaıy pılottyq joba qolǵa alynyp, nátıjesinde jyl basynan beri 13974 is medıasııa tártibimen sheshildi.
Al, Ońtústik Qazaqstan oblystyq «Qoǵamdyq kelisim» mekemesinde ashylǵan medıasııa kabınetinde 600-ge jýyq azamatqa quqyqtyq kómek kórsetildi. Oblystaǵy 4 medıasııa ortalyǵymen áriptestik baılanys ornatyp, óńirde qyzmet atqaratyn 44 kásibı, 546 kásibı emes medıatorlardyń derekqory túzildi. О́ńirdegi medıatorlardyń yqpalymen byltyrǵy jyly 4 myńnan astam is boıynsha taraptar ortaq mámilege kelse, bıylǵy jyldyń 8 aıynda 3207 is sotqa deıingi tártippen sheshildi.