Qazaq boksynyń jarqyn bolashaǵy sanalatyn Sadrıddın Ahmedov endi kásipqoı boksta ǵana óner kórsetedi, dep habarlaıdy qsport.kz.
Kásipqoı boksqa aýysýdaǵy basty maqsaty týraly
«Jalpy meniń judyryqtasý mánerim áýesqoı boksqa qaraǵanda, kásipqoı boksqa jaqsy keledi» , dep áńgimesin bastady otandasymyz. Janyma da áýesqoı bokstan góri kásipqoı boks jaqynyraq. Endi kásipqoı boksta baǵymdy synap, elimizdiń ataq-dańqy men abyroıyn asqaqtatýdy kózdeımin. Bul sheshimdi aıaq-astynan qabyldaǵan joqpyn. Qazaq aıtady ǵoı: jeti ret oılap, bir ret kes dep, sol sebepti bul sheshim men úshin durys dep oılaımyn. Qazaqstan tarıhyndaǵy kásipqoı bokstan eń jas álem chempıony atanýdy jáne WBC, WBO, WBA jáne IBF tujyrymdarynyń belbeýin utýdy kózdeımin. Alla qalasa, bul belesterdiń bárin baǵyndyratynyma senemin», deıdi Sadrıddın.
Jastar arasynda álem chempıony
«Kásipqoı boksqa aýysýdaǵy basty sebepterimniń biri de osy. Sondaı-aq 69 keli salmaq dárejesindegi álemniń eń úzdik boksshylary Qazaqstanda ekeni bárine belgili. Qazaq baýyrlarymmen sharshy alańda jan talasyp judyryqtasqansha, kásipqoı bokstaǵy tájirıbemdi jetildirip, belbeýlerge talasýǵa bir qadam bolsa da jaqyndaı bereıin dep sheshtim», dedi ol.
Promoýterlik kompanııalardyń usynysy jaıly
«Qazir amerıkalyq The Heavyweight Factory kompanııasymen kelisimshart júrip jatyr. Ázirge qol qoıǵan joqpyn. Eki jaqty máselelerdi tolyq sheshken kelisimge qol qoıyp, jattyǵýymyzdy birden bastap ketemiz. 4 jylǵa sozylǵan kelisimshart boıynsha osy ýaqyt aralyǵynda mende WBC, WBO, WBA jáne IBF tujyrymdarynyń chempıondyq ataǵyna talasýyna múmkindigim bar. Alla qalasa, osy jyldyń aıaǵyna deıin alǵashqy jekpe-jegimdi de ótkizip qalýym múmkin» deıdi Sadrıddın Ahmedov. Sondaı-aq otanasymyz menedjeri Lýıs Ortıs syndy álemge tanymal bylǵary qolǵap sheberlerimen birge jumys istegen, tanymal promoýter Rıkkaro Rısso ekenin de atap ótti.
Eń úzdik jas boksshy
Aıta keteıik, Sadrıddın Ahmedov 69 kelide el namysyn qorǵaıtyn Qazaqstandaǵy úzdik bylǵary qolǵap sheberleriniń biri. Otandasymyz 2016 jyly jastar arasynda ótken álem chempıonatynda úsh qarsylasyn nokaýtpen utyp, el qorjynyna jalǵyz altyn júldeni salǵan bolatyn. Ahmedov sharshy alańda 251 jekpe-jek ótkizip, 241 ret qarsylasynan basym bolǵan. Sondaı-aq Sadrıddın bokstan Shymkentte ótetin el chempıonatynyń 69 kelidegi basty favorıtteriniń biri sanalǵan edi.