Búgin Almatyda qarttar kúnine oraı «Sporttyq Almaty» baǵdarlamasy aıasynda on toǵyzynshy velosherý ótti, dep habarlaıdy qalalyq sporttyq hab.
Ádettegideı, «Nurly Taý» bıznes ortalyǵynan bastalǵan 9 shaqyrymdyq qashyqtyqty quraıtyn velosherý Tuńǵysh Prezıdent saıabaǵynda aıaqtaldy. Márede qatysýshylardyń arasynda baǵaly syılyqtar men velosıped oınatyldy. Basty syıdyń ıegeri Shákárim Áýbákirov atandy.
«Birinshi ret qatysyp, velosıped utqanyma sene alar emespin. О́zim velosportpen shuǵyldanamyn. Mende birneshe velosıped bar, sondyqtan syılyǵymdy óz bapkerime tabystaımyn», - dedi jeńimpaz Shákárim Áýbákirov. Uıymdastyrýshylar sport ardagerlerine qurmet kórsetip, syılyqtar tabystady.
Merekelik velosherýge Nazarbaev ıntellektýaldy mektebiniń oqýshylary da qatysty.
«Biz oqýshylarymyzdy salaýatty ómir saltyna, sportqa baýlýǵa tyrysamyz. Eko festıvalge osy sebepti qatystyq. Jalpy, qala turǵyndarynyń ekologııalyq kólik túrin qoldanǵanyn qoldaımyz. Bul festıval qala ákimdiginiń jáne birikken ulttar uıymynyń (BUU) qoldaýymen ótedi. BUU mektepterimizge jıyrma sporttyq velosıped berdi. Velosherýge birinshi ret qatysyp otyrmyz. Endi, balalarymyz apta saıyn velosportpen aınalysady degen oıdamyn», - dedi zııatkerlik mektebiniń hımııa-bılogııa baǵytynyń dırektory Gúlmıra Baqytbekqyzy.
Aıta keter jaıt, osy velosherý «Sporttyq Almaty» qalalyq baǵdarlamasynyń qoldaýymen 2017-shi jyly josparlanǵan 21 velosherýdiń on toǵyzynshysy. Atalmysh baǵdarlama megapolıstegi buqaralyq sportty damytý maqsatynda júzege asyrylýda.