Aqtaýda «Sóz ben saz» atty avtorlyq baǵdarlamanyń tusaýy kesilgenine bir jyl boldy.
Mańǵystaý óńirinde, jalpy qazaq dalasynda áýenderi shyrqalyp júrgenmen ózderi tasada qalǵan nemese ómirden ótip ketken sazgerlerdi halyqqa tanytý, nasıhattaý maqsatyndaǵy baǵdarlama kórermen yqylasyna bólenip keledi.
– Aqtaýda belgili «Shalqymaly» ániniń avtory, ánshi-sazger, aqyn, jýrnalıst Talǵat Atshybaev aǵamyzdyń qaraly namazy ótip jatqan kez. Aǵaıyn-týys, el-jurty óz aldyna, qaıǵydan qan jutqan óner adamdary talantty aǵalaryn qımaı tunjyrap turǵan. Osy kezde ánshi Baımurat «átteń, bizdiń asyldy tirisinde baǵalaı bilmeıtin óte nashar ádetimiz bar... Qazaqtyń talantty qansha uly men qyzy kózi tirisinde qoldaýsyz, qoshametsiz, nasıhatsyz ketti?! О́lgen soń ótirik múláıimsigendeı bolyp júrgen joqpyz ba, álde daryndylardyń tek ólgenin ǵana kútemiz be? – dep kúıinip, bir ıdeıanyń ushyn siltegendeı boldy. Oılana kele, «Sóz ben saz» baǵdarlamasynyń tusaýyn kestik, deıdi joba avtory Berdihan Álmen.
Baǵdarlama aıasynda bir jyl ishinde úsh ret konsert ótkizilip, alǵashqy konsertte 22 sazgerdiń basyn qossa, ekinshi konsertke – 18, bir jyldyqqa oraı uıymdastyrylǵan úshinshi konsertke 12 sazger qatysqan. Osy ýaqyt aralyǵynda barlyǵy 63 sazgerdiń 584 áni «Qazaqstan-Aqtaý» telearnasy arqyly nasıhattalǵan. Atalmysh jobaǵa tek mańǵystaýlyq qana emes, elimizdiń Taraz, Qyzylorda, Atyraý, Almaty, Astana, Shymkent, Semeı qalalarynan sazgerler qatysyp, óz ánderin tyńdarmandarǵa usyndy. Olardyń arasynda О́ktem Altaev, Kentaý Nazarbek, Bekjigit Serdáli, Ábdireıim О́mirov, Saýranbek Eleýov, Ábdiǵapar Temirov syndy sazgerler bar. Úshinshi konsertte «Qyzdarǵa ásemdik jarasady» ánimen tyńdarmanyn tánti etken qostanaılyq Qaırat Nurǵazın, «Qyzdar-aı, qyzdar», «Meni oılap qam jemeshi» ánderiniń avtory tarazdyq Úmit Bıtenova, Qyzylordadan «Qorqyt ata qobyzy» ániniń avtory Ramazan Taımanov qonaq retinde qatysty.
Jurtshylyqtyń yqylasyna ıe bolǵan baǵdarlama týraly joba avtory teńiz jaǵasynda aýqymdy konsert ótkizý jáne Mańǵystaý óńirindegi 1936 jyly týylǵan Sh.Sabytaevtan bastap, qazirgi eń jas sazger, Q.Nurtas, T.Tóráli ánderin jazyp júrgen jerlesimiz – О́.Amangeldıev arasyndaǵy sazgerlerdiń shyǵarmalaryn jınaqtap, án mátinderi men notalary basylǵan «Mańǵystaý sazgerleriniń antologııasyn» shyǵaryp, oblys mektepteri men mádenıet úılerine taratý, sondaı-aq «Sóz ben sazdyń» efırden ótken sandaryn DVD dıski túrinde taratý jospary bar ekendigin aıtty.
Gúlaıym ShYNTEMIRQYZY, «Egemen Qazaqstan»
Mańǵystaý oblysy