Ońtústik Qazaqstan oblysynyń ákimi Janseıit Túımebaev «Phoenix Global» kompanııasynyń TMD jáne Orta Azııa elderi boıynsha aımaqtyq dırektory Ashıl Kaýl bastaǵan delegasııamen kezdesti. Kezdesý barysynda taraptar aýyl sharýashalyǵy salasyn damytý baǵytynda áńgime órbitti.
Kezdesýde sóz alǵan Ashıl Kaýl myrza óńir basshysyna kompanııanyń aýyl sharýashylyǵyn damytý baǵytyndaǵy atqaryp otyrǵan jumystaryn baıandap berdi.
«Bizdiń kompanııa aldaǵy ýaqytta jemis-jıdek jáne kókónis klasterin damytýǵa erekshe mán berip otyr. Osy rette Ońtústik Qazaqstan oblysynyń aýyl sharýashylyǵy salasyndaǵy potensıaly qyzyqtyrýda. Bizdiń kompanııa 2016 jyldan beri aýyl sharýashylyǵy salasynda eleýli eńbek etip, ónimdi saqtaý ári alǵashqy óńdeýden ótkizý isimen aınalysyp keledi. Qazaqstanda 42 myń 204 gektarǵa jýyq jerimiz bar. Onda negizinen bıdaı, arpa egilip, jem-shóp azyqtaryn daıyndaý salasyna basymdyq berilip otyr», - dedi «Phoenix Global» kompanııasynyń aýmaqtyq dırektory Ashıl Kaýl myrza.
Atalǵan kompanııanyń álemdik aýyl sharýashylyǵyn damytýda da qosyp otyrǵan úlesi orasan. Tek qana bıdaı egý ǵana emes, kúrish ósirý, ósimdik maıyn óndirý isimen de aınalysady. Sondaı-aq fermerlik sharýashylyqty damytyp, baý-baqsha, gúl ósirý isinde de jetken jetistikteri az emes eken.
Kompanııanyń múmkindikterine qanyqqan óńir basshysy qonaqtarǵa oblysymyzdaǵy aýyl sharýashylyǵy salasyndaǵy jetekshi sektorlardy áńgimelep berdi. Sondaı-aq aldaǵy ýaqytta yntymaqtastyq negizde birlese jumys isteýge ázir ekenin jetkizdi.
«Ońtústik Qazaqstan oblysy - agrarly óńir. О́ńirde sýarmaly egistik kólemi 466 myń gektarǵa jýyqtaıdy. Osy rette sizderdiń kompanııalaryńyzdyń áleýeti kóńil qýantyp otyr. Aldaǵy ýaqytta oblys ákimdigi men kompanııa yntymaqtastyqty arttyryp, birlesken ınvestısııalyq jobalardy júzege asyrýǵa bolatynyna senim mol», - dedi Janseıit Qanseıituly.
Kezdesý sońynda taraptar estelikke sýretke túsip, syı-sııapat almasty.