Batys Qazaqstan oblysynyń eki oblystyq, 12 aýdandyq gazetteriniń basyn qosqan «Jaıyq Press» medıaholdınginde jýrnalısterdiń biliktiligin arttyrýǵa arnalǵan eki kúndik semınar ótti. Aýdandyq gazetterden jınalǵan jas tilshilerge tanymal jýrnalıster túrli taqyrypta dáris oqydy.
Batys Qazaqstan óńirlik basylymdary bıyl bir ǵasyrlyq mereıtoıyn atap ótti. Qazaq jýrnalıstıkasy erte qalyptasqan óńir bolǵanymen, Oralda kásibı mamandar tapshy. О́ıtkeni maman tilshi daıyndaıtyn joǵary oqý oryndary shalǵaı, Almaty men Astana asqan biren-saran jas elge orala bermeıdi. Sondyqtan «Jaıyq Press» JShS basshysy Jantas Safýllın bıyl mekeme qyzmetkerleriniń bilimin jetildirýge, sheberligin ushtaýǵa basymdyq beretinin aıtqan edi. Búgingi sharanyń maqsaty – jergilikti memlekettik aqparat quraldarynda qyzmet etetin jas jýrnalısterdiń kásibı biliktiligin arttyrý, ýaqyt talabyna saı jedel aqparat taratýǵa, zamanaýı medıaúrdisti meńgerýge, zańdy quqyqtaryn jetik bilýge mashyqtandyrý boldy.
Semınardyń alǵashqy kúni tanymal jýrnalıst, Qazaqstan Respýblıkasy aqparat salasynyń úzdigi Esenjol Qystaýbaev óz tájirıbesimen bólisti. Oqyrman qaýym bıyl paıǵambar jasyna tolǵan Esenjol Jumaǵululyn saraptama maqalalary, jýrnalıstik zertteýleri arqyly jaqsy biledi. Jas tilshiler oqyrmannyń redaksııaǵa túsken aryz-shaǵymdarymen jumys isteý, kúrdeli quqyqtyq taqyryptardy zertteý joldarymen tanysty.
«Oral óńiri» gazetiniń bólim redaktory Sáken Ábilhalyqov semınarǵa qatysýshylarǵa saraptamalyq maqala jazýdaǵy erekshelikter, túıtkilder jóninde oı bólisti. Sáken Muratuly – 2015 jyly QR Investısııalar jáne damý mınıstrligi, «Tehnologııalyq damý jónindegi ulttyq agenttik» AQ jáne Qazaqstandaǵy British Council-diń bastamasymen jarııalanǵan Ulttyq ınnovasııalar baıqaýynda Gran-prı júldesine ıe bolyp, 1 mln. teńgeden bólek London qalasynda kásibı taǵylymdamadan ótip kelgen bolatyn.
«Jaıyq Press» aqparat ortalyǵynyń jetekshisi Nurlybek Rahmanov medıamátinmen jumys tásilderi taqyrybynda dáris ótkizdi. Bloger retinde, medıatrener retinde kópshilikke tanylyp qalǵan Nurlybek Nurlanuly áleýmettik jelilerdegi jaýapkershilik, QR zańnamalaryndaǵy normalar týraly toqtaldy.
Eki kúndik semınar kezinde qatysýshylarǵa naqty tapsyrma berilip, alǵan aqyl-keńesti praktıka júzinde paıdalanyp kórdi. Semınar sońynda medıaholdıngtiń bas dırektory Jantas Safýllın qatysýshylarǵa sertıfıkat tabystady.
Mundaı sharalar «Jaıyq Presste» jyl sońyna deıin júrip turmaq. Endigi kezekte tehnıkalyq mamandar, gazet qurýshylary men dızaınerlerge arnalǵan semınar-trenıngter uıymdastyrylady.
Qazybek Quttymuratuly,
«Egemen Qazaqstan»
ORAL