Astanada Azııalyq ıadrolyq kooperasııa forýmynyń mınıstrler deńgeıindegi 18-shi keńes ótti. Jıynǵa álemniń birqatar elinen kelgen mınıstrler men iri laýazymdy tulǵalar qatysty. Keńeste qorshaǵan ortany qorǵaý barysynda ıadrolyq ǵylym men tehnologııalardy qoldaný jóninde sóz boldy.
Is-sharaǵa qatysqan Energetıka mınıstri Qanat Bozymbaevtyń sózine saı, keńestiń jumysy eń áýeli ıadrolyq ónimderdi beıbit maqsatta qoldanýǵa baǵyttalǵan. Vedomstvo basshy mundaı forýmdardyń ıadrolyq medısına jáne aýylsharýashylyǵyna jańa ádistemelerdi engizýge kómektesetinin aıtady. Sondaı-aq, mınıstr jıynnyń ıadrolyq qarýdy taratpaýǵa jáne ıadrolyq tehnologııalardyń ozyq úlgilerin meńgerýge tıgizer paıdasyna toqtalyp, Qazaqstannyń atom energııasyn beıbit túrde qoldanatynyn málimdedi.
«Qazaqstan Azııalyq ıadrolyq kooperasııa forýmynyń quramyna 2010 jyldan beri múshe. Sodan beri elimiz uıym jumysyna belsene qatysyp keledi. Biz atom energııasyn beıbit maqsatta qoldaný boıynsha álemdegi qoǵamdastyqtarmen áriptestik ornatýǵa múddelimiz», – dedi Q.Bozymbaev.
Sonymen qatar, jýrnalısterge bergen suhbatynda Energetıka mınıstri elimizdegi ýran óndirisiniń damý baǵytyna toqtaldy. Onyń aıtýynsha, qazirgi tańda Qazaqstan álemde ýran óndirý boıynsha kósh bastap tursa, «Qazatomprom» kompanııasy men onyń elimizdegi áriptesteri shyǵarǵan radıoaktıvti elementi álemdik naryqtyń 40 paıyzyn quraıdy. Q.Bozymbaev keleshekte Qazaqstan atom stansııalarynda qoldanatyn ónimdi ózimizde shyǵarýǵa talpynatynyn ýáde etti.
Keńes jumysyna qatysqan Japonııa atom energııasy jónindegi komıssııasy tóraǵasy Ioshıakı Oka atom energııasyn beıbit maqsatta paıdalanýdyń tıimdiligin sóz ete kele, ıadrolyq tehnologııa men elektrostansııalardan Japonııanyń bas tartpaıtynyn jetkizdi.
«Bıyldan bastap Japonııa ıadrolyq tehnologııany qoldaný jóninde jańa strategııa bekitti. Bul baǵyt atalǵan salaǵa qatysty eldegi negizgi qujat bolyp sanalady. Japonııa ıadrolyq tehnologııanyń qaýipsizdigin nyǵaıtý men halyq arasynda túsindirý jumystaryn júrgizedi. Atom energııasyn beıbit maqsatta qoldanýdyń adamzatqa tıgizer paıdasy mol ekenine senimdimin. Sondyqtan, Astanada ótip jatqan forým jarqyn bolashaqqa jol ashatyny anyq», – dedi I.Oka.
Bıylǵy Keńes jumysyn Energetıka mınıstrligi, Japonııa atom energııasy jónindegi komıssııasy jáne Japonııa mınıstrler kabınetiniń hatshylyǵy uıymdastyryp otyr. Sharaǵa forýmǵa múshe 12 elden arnaıy meımandar kelgen. Jalpy, uıym 2000 jyly Atom energııasy jónindegi komıssııasynyń bastamasymen Azııa jáne Tynyq muhıty elderi arasynda ıadrolyq jáne radıasııalyq tehnologııany tıimdi paıdalaný jóninde áriptestik ornatý maqsatynda quryldy.
Abaı ASANKELDIULY,
«Egemen Qazaqstan»