Astananyń «Barysy» Qurlyqtyq hokkeı lıgasyndaǵy kezekti kezdesýinde Ombyda jergilikti «Avangard» komandasymen kúsh synasty.
Eki komanda arasyndaǵy teketirestiń taǵdyryn «Barys» klýbynyń alǵashqy 20-mınýtta-aq sheship qoıatyn múmkindigi bar edi. Alaıda «Avangard» qaqpashysy ondaı múmkindikti bere qoımady. Dese de, elordanyń komandasy alǵashqy kezeńde eki shaıba soǵyp, alǵa shyqty. Áýeli matchtyń 5-mınýtynda Nıkıta Mıhaılıs esep ashsa, 13-mınýtta Pavel Akolzın nátıjeni 2:0-ge jetkizdi.
Oıynnyń ekinshi kezeńin de «Barys» komandasy nátıjeli bastady. Kanadalyq shabýylshy Mettıý Frettın 23-mınýtta esepti eseleı tústi. Úsh shaıba ótkizip alǵan qonaqtar óz alańynda jeńilip qalmaýdyń qamyn oılap, ekinshi jıyrma mınýttyń orta tusyna aýǵanda «Barys» qaqpasynyń mańynda qaýipti shabýyldardy uıymdastyra bastady. Nátıjesinde «Avangard» shabýylshylary Andre Petersson men Pıotr Hohrıakov bes mınýtta esepti bir shaıbaǵa deıin qysqartty.
Úshinshi kezeńniń 54-mınýtynda Mettıý Frettın dýbl avtory atandy. Aradan bir mınýt ótkende ombylyq Evgenıı Medvedev esepti qysqartqanymen, «Barystyń» jeńisine esh kedergi keltire almady.
Osy jeńisten keıin «Barys» upaı sanyn 32-ge jetkizip, Shyǵys konferensııasy boıynsha altynshy orynǵa turaqtady. Elorda klýby QHL-daǵy kelesi oıynyn erteń Hanty-Mansııskide jergilikti «Iýgra» komandasymen ótkizedi.
Álı BITО́RE,
«Egemen Qazaqstan»