Densaýlyq saqtaý mınıstrligi tarapynan dári-dármekterdiń qymbattaýyna qarsy qandaı kúres sharalary qolǵa alynyp jatyr. Bul týraly Densaýlyq saqtaý mınıstrligi Farmasııa komıtetiniń tóraıymy Lıýdmıla Bıýrabekova Ortalyq kommýnıkasııalar qyzmetinde ótken baspasóz konferensııasynda aıtyp berdi.
Spıkerdiń sózinshe Mınıstrlik dárilik zattardy paıdalaný salasyn qalyptastyrý boıynsha ártúrli sharalardy qabyldaýda.
«Bıylǵy jyldyń 3 aqpanynda Úkimettiń keńeıtilgen otyrysynda jáne 4 qyrkúıekte Parlament palatasynyń birlesken otyrysynda talqylanǵan bıýdjet qarajatyn jumsaý tıimdiligine, onyń ishinde dárilik zattar men medısınalyq texnıkamen qamtamasyz etý barysyna, sondaı-aq otandyq farmasevtıkalyq naryqty damytýda týyndaǵan kedergilerge taldaý júrgizý qajettiligi jaıynda máseleler kóterildi. Osy baǵytta Mınıstrlik birqatar jumystar atqardy», dep atap ótti Densaýlyq saqtaý mınıstrligi Farmasııa komıtetiniń tóraıymy Lıýdmıla Bıýrabekova.
Onyń aıtýynsha, Mınıstrlik dárilik zattardy paıdalaný aıasynda júzege asyryp otyrǵan sharalardy tórt negizgi baǵytqa bólýge bolady.
«Atap aıtsaq, Ekonomıkalyq qoljetimdilikti qamtamasyz etý – bul degenimiz memlekettiń tegin medısınalyq kómektiń kepildik berilgen kólemi sheńberinde satyp alatyn dárilik zattardyń baǵasyn retteýdiń qoldanystaǵy júıesin jaqsartý, Memleket satyp alatyn dárilik zattardyń tizimin qalyptastyrýda ashyqtyqty qamtamasyz etý – medısınalyq texnologııany baǵalaýdyń xalyqaralyq mexanızmderin engizý, medısınalyq texnıkany jáne dárilik zattardy satyp alýdyń ashyq rásimin qamtamasyz etý - ambýlatorlyq deńgeıde tegin dárilik zattardy qamtamasyz etýdi ortalyqtandyrý jáne elektrondy satyp alýǵa kóshý, medısınalyq ónimder men dárilik zattardy tirkeý rásimin jeńildetý», dedi spıker.
Sonymen qatar Densaýlyq saqtaý mınıstrligi Farmasııa komıtetiniń tóraıymy Lıýdmıla Bıýrabekova biryńǵaı dıstrıbıýtor jumysynyń sońǵy úsh jyldyq qorytyndysy boıynsha, satyp alý qurylymynda otandyq jáne sheteldik óndirýshilermen, onyń ishinde BUUBQ-men tikeleı kelisimderdiń úlesi artqanyn atap ótti.
Raýan QAIDAR,
«Egemen Qazaqstan».