Búgin Túrki akademııasy halyqaralyq uıymy (TWESCO) Vengrııanyń Qazaqstandaǵy elshiligimen birlesip, majar etnografy, professor Mıhaı Hoppaldyń zertteýi boıynsha «Shamandar men jora-rásimder» atty fotokórme uıymdastyrdy.
Kórmeniń ashylý saltanatyna belgili memleket jáne qoǵam qaıratkerleri, kórnekti túrkitanýshy ǵalymdar, Qazaqstanda tirkelgen dıplomatııalyq korpýs ókilderi men jýrnalıster qatysty.
Alqaly sharany akademııa basshysy Darhan Qydyráli quttyqtaý sózimen ashty. Ol kórmege arqaý bolǵan tanymal majar ǵalymy Mıhaı Hoppaldyń shyǵarmashylyǵy, ásirese kóshpendi halyqtar men shamandyq ilimdi zerdelegen zertteý jumystary jóninde áńgimeledi. Sonymen birge Vengrııa men Túrki akademııasy arasynda ornaǵan berik yntymaqtastyq pen ǵylymı jobalar týraly tarqatty.
Budan keıin sóz alǵan Túrki Keńesi aqsaqaldar keńesiniń múshesi Ádil Ahmetov majar-túrki rýhanı baılanystary jóninde paıymdy pikrin bildirdi.
- Túrki akademııasyna baqylaýshy retinde Vengrııa eliniń enýi úlken oqıǵa. Bizdiń uly dala dep júrgenimiz Altaıdan bastalsa, bir jaǵy Dýnaıdan aıaqtalady. Qazaqstanmenen Vengrııanyń arasyndaǵy dıplomatııalyq, saıası-ekonomıkalyq salalardaǵy qarym-qatynas jaqsy damyp kele jatyr. Túrki keńesiniń altyn arqaýy – Túrki akademııasy. О́ıtkeni ǵylymnyń barlyq salasy bar. Osy turǵydan kelgende búgingi kórmeniń mańyzy zor. Shamanızm qazaq arasynda áli de saqtalyp keledi. Shamanızm taqyrybynyń fotokórmeniń arqaýyna aınalýy aıtýly oqıǵa, - deıdi Altaı óńirin tereń zerttep júrgen ǵalym Ádil Ahmetov.
Buǵan deıin habarlaǵanymyzdaı, 2017 jyldyń qyrkúıek aıynda BUU Bas Assambleıasynyń 72-shi sessııasy sheńberinde ótken Túrki keńesine múshe memleketterdiń Syrtqy ister mınıstrleriniń beıresmı kezdesýinde Vengrııanyń Túrki akademııasyna baqylaýshy mártebesin alý týraly ótinimi biraýyzdan maquldanǵan bolatyn. D.Qydyráli osyǵan oraı Majarstannyń Qazaqstan Respýblıkasyndaǵy Elshisi Andrash Baranı myrzaǵa iltıpatyn bildirdi.
- Vengrııa men Qazaqstan arasyndaǵy dıplomatııalyq qatynastardyń ornaǵanyna 25 jyl tolýy biz úshin úlken mártebe. Osy kezeń ishinde, jalpy kóshpeli órkenıettiń Eýropadaǵy eń qıyrdaǵy ókili Vengrııamen tereń qarym-qatynastar ornady Sonyń bir aıǵaǵy - Túrki akademııasyna Vengrııanyń baqylaýshy múshe bolyp enýi. Mereıli izetpen dıplomatııalyq qatynastardyń 25 jyldyǵymen jáne Vengrııa Respýblıkasynyń halyqaralyq Túrki akademııasyna alǵashqy baqylaýshy múshe bolyp enýimen shyn júrekten quttyqtaǵym keledi. Osy kezeńde eńbegi erekshe tulaǵalar boldy. Solardyń biri Qazaqstandaǵy Vengrııa elshisi Andrash Baranı myrza, - degen akademııa basshysy saltanatty shara aıasynda A.Baranıge «Tamyrlas xalyqtar arasyndaǵy yntymaqtastyqty damytýǵa qosqan zor úlesi jáne ǵylym-bilim salasyndaǵy baılanystardy tereńdetýdegi jemisti qyzmeti úshin» qurmet gramotasyn tapsyrdy.
О́z kezeginde Elshi Túrki akademııasy ujymyna kóshpendi halyqtar mádenıetin zerttep, nasıhattaýdaǵy qyzmeti úshin rızashylyq bildirdi.
Aıa О́mirtaı,
«Egemen Qazaqstan»