Taıaýda Qaraǵandy oblysynyń Sátbaev qalasynda Rýhanı kelisim kúni qarsańynda Dostyq úıi ashyldy. Bul – Elbasy Nursultan Nazarbaevtyń ult birligi men memleket tutastyǵyn odan ári nyǵaıta túsýge qatysty tapsyrmalarynyń minsiz atqarylyp jatqandyǵynyń aıǵaǵy. Búgingi tańda Sátbaev qalasynda orys, ýkraın, tatar jáne koreı ortalyqtary, sondaı-aq Baltyq jaǵalaýy halyqtarynyń yntaly toptary jumys isteıdi.Endi kendi shahardyń barlyq etnomádenı ortalyqtary bir shańyraq astyna jınalatyn bolady.
Atalmysh «Dostyq úıi» Qaraǵandy men Jezqazǵan qalalaryndaǵy osy tektes ortalyqtardan keıin iske kiriskeli otyrǵan úshinshi shańyraq bolyp otyr.Dostyq úıin ashý máselesi burynnan pisip jetildi, dep atap ótti Sátbaev qalasynyń ákimi Asqar Ydyrysov.
– Rýhanı keliisim kún – meıirimdilik jáne birlik merekesi qarsańynda biz osy nysandy ashyp otyrmyz, – dedi qala basshysy. – Menińshe barlyq etnomádenı ortalyqtar úshin bul úlken mańyzǵa ıe. Munda jumys úshin barlyq jaǵdaı jasalǵan – akt zaly, ádistemelik kabınet, kitaphana, ana tilin oqyp-úıretýge, jas urpaqty ulttyq mádenıetke baýlýǵa arnalǵan oqý synyby bar.
Dostyq úıi etnosaralyq qarym-qatynasqa, qoǵamdyq uıymdar arasyndaǵy yntymaqtastyq pen ózara seriktestikti nyǵaıtý úshin ashyq alań bolatynyna ol senimin bildirdi.
Dostyq úıi «Qazaqstan halyqtarynyń rýhanı, qoǵamdyq jáne ultaralyq yntymaqtastyǵy ortalyǵy» KMM quzyrynda bolmaq. Qalanyń etnomádenı birlestikterinen bólek, munda «Shyndyq» shyǵarmashylyq zııalylar qoǵamdyq uıymy jáne ómirlik qıyndyqqa tap bolǵan áıelder men balalarǵa arnalǵan daǵdarys ortalyǵy jumys isteıtin bolady.
Dostyq úıiniń ashylýymen Sátbaev qalasynyń turǵyndaryn Qazaqstan halqy Assambleıasynyń oblystyq hatshylyǵynyń jetekshisi Erlan Qusaıyn quttyqtady. Qaraǵandy oblysy ákiminiń atynan ol jańa mekemege Álıhan Bókeıhannyń 15 tomdyq shyǵarmalar jınaǵyn syıǵa tartty.
– Qazaqstan halqy – san qıyndyqty basynan keshe júrip, erik-jigeri eshqashan muqalmaǵan el. Ult basynan ótken qasiretti syndar erteńine úmit artqan qalyń qaýymnyń qaırat-jigerin janyp, talaby men talpynysyn ushtaı túsken. Soǵan dánekerlik etken qudiretti kúsh – birlik.
Sol birlikti bekem saqtaý qajet. Memleket basshysynyń salıqaly saıasatynyń túp-tamyry osy ustanymǵa negizdelgen, – dedi óziniń quttyqtaý lebizinde Qaraǵandy oblysy ákiminiń ókili.
Ádemi tilektermen qatar, qalalyq máslıhattyń hatshysy Tatıana Hmılıarchýk yntymaq oshaǵyna kilem jáne ydys-aıaq jıyntyǵyn syıǵa tartty. Birlik ordasynyń lentasy qıylyp, shashý shashylǵan soń jıylǵan jurtshylyq onyń ishki jaǵdaıyn zerdelep, erekshelikterimen jete tanysty.
Sonymen qatar onda etnomádenı ortalyqtarymen birge qalalyq «Qazaq tili» qoǵamy da ornalasqan. Budan tysqary, májilis-konsert zaly, dárishana, mýzeıi jáne kitaphanasy bar. Bolashaqta mekeme ákimshiligi kabıetterinen bólek «Mesenattar bólmesin» jasaqtaý da josparǵa engizilipti.
Saltanatty shara barysynda etnomádenı ortalyqtardyń jetekshileri sóz alyp, tıisinshe, ár ulttyń ánderi áýeledi. Birlik tamyry berik bolsyn degen yrymmen «Dostyq gúli» otyrǵyzyldy. Tusaýy endi ǵana kesilgen jańa mekemeniń dırektory bolyp Gúlnaz Gatııatova taǵaıyndaldy.
Aıta keteıik, Qazaqstanda Rýhanı kelisim kúni jyl saıyn 18 qazanda atap ótiledi.
Bul kúni 1992 jyly Almatyda Prezıdent Nursultan Nazarbaevtyń bastamasymen Búkilálemdik rýhanı kelisim kongresi ótken. Oǵan qatysýshylar qaqtyǵystar men kelispeýshilikterge moratorıı jarııalanǵan kúndi, tatýlyq, meıirimdilik jáne jaqynǵa kómek kórsetý kúnin Rýhanı kelisim kúni etip bekitý týraly manıfest qabyldady.
Mıras ASAN, «Egemen Qazaqstan»
Qaraǵandy oblysy, Sátbaev qalasy