О́ńirde 28194 múmkindigi shekteýli jan bolsa, 2 myńnan astamy – balalar men jasóspirimder. Jýyrda «Meıirimdilik pen túsinistikke jol ashyq» atty festıval barysynda olarǵa jan-jaqty qurmet kórsetildi.
11 aýdan men oblys ortalyǵyndaǵy 9 áleýmettik mekeme qatysqan sharada sóılegen sózinde óńir basshysynyń orynbasary Asqar Saqypkereev múmkindigi shekteýli adamdarǵa memleket pen qoǵam tarapynan jan-jaqty qamqorlyq kórsetiletinin, onyń bir mysalyna bıyl «Áleýmettik jobalar baıqaýy uıymdastyrylǵanyn, oǵan jerlesterimizdiń belsene atsalysqanyn jetkizdi. Olardyń arasynda taǵdyr tálkegine ushyrasa da, jigeri jasymaǵan, belgili bir kásipti urshyqsha úıirip júrgen azamattar kóptep sanalady.
Máselen, bıyl elimiz boıynsha ótkizilgen áleýmettik jobalar baıqaýyna qatysqan jerlesimiz Ýálıhan Ybyraev yntalandyrý syılyǵyna ıe boldy. 32 jastaǵy petropavldyq týabitti múgedekter úshin arnaıy jyljymaly monsha jasap shyǵarǵan.
Shyǵarmashylyq festıval sheńberinde qala men aýdandardan kelgen qatysýshylar óz ónerlerin ortaǵa saldy. Áýelete án shyrqap, myń burala bılep, kórermenderdiń qoshemetine bólendi. Vokal, horeografııa, kórkemsóz, aspapty jáne dekoratıvti-qoldanbaly shyǵarmashylyq atalymdar boıynsha úzdikter anyqtaldy. «Qazaq zaǵıptar qoǵamynyń» oblystyq fılıaly, estý kemistigi bar balalarǵa arnalǵan ınternat úıi, Petropavl áleýmettik qyzmet kórsetý balalar ortalyǵy, tirek-qımyl apparaty zaqymdanǵandarǵa arnalǵan ınternat úıi, Taıynsha áleýmettik qyzmet kórsetý ortalyǵynyń ónerli ujymdary dıplomdarmen, baǵaly syılyqtarmen marapattaldy.
Sóz arasynda estý qabileti nashar balalardan quralǵan «Sensitive» baldyq bı ansambli kesh shyraıyn asha túskenin, olardyń halyqaralyq baıqaýlarda Gran-prı utyp alǵanyn aıta ketken jón. Sondaı-aq múmkindigi shekteýli balalar salǵan sýretter men qolóner týyndylary kórmege qoıyldy.
Shyǵarmashylyq festıval jas kúıshilerdi de toǵystyrdy. «Úkili dombyra» saıysy «Qazaqstannyń halyq aǵartý isiniń úzdigi», ardaqty ustaz, dáýlesker kúıshi Serikbaı Qusaıynovtyń 80 jyldyǵyna arnaldy. 16 men 40 jas aralyǵyndaǵy úmitkerler baıqaý sharty boıynsha Serikbaı Bárıulynyń repertýarynan bir kúı jáne ataqty kúıshilerdiń shyǵarmasyn oryndady. Bas júlde Jambyl aýdanynyń namysyn qorǵaǵan Erbolat Serikbaıǵa buıyrdy.
О́mir ESQALI,
«Egemen Qazaqstan»
Soltústik Qazaqstan oblysy
Sýretti túsirgen
Amangeldi BEKMURATOV