Aqan seriniń «Balqadısha» ánin bilmeıtin jan kemde-kem shyǵar. Jan dúnıeńdi terbetetin osy bir án áli kúnge deıin shyrqalyp keledi. Tipti onyń estradamen oryndalýy da ózindik bir áser qaldyrady. Bul oraıda Balqadıshaǵa arnap eskertkish ashylǵandyǵyn da qaperge sala ketýdi jón kórdik.
Jalpy Aqmola oblysy ishki saıasat basqarmasynyń О́ńirlik kommýnıkasııalar qyzmeti «Týǵan jer» arnaıy jobasy aıasynda óńirimizdegi eń tanymal tarıhı eskertkishterdi jazyp-jarııalaý serııasyn jalǵastyryp keledi. Aty ańyzǵa aınala bastaǵan Balqadıshaǵa ornatylǵan eskertkish týraly jan-jaqty aqparat berýi kópshilik suranysynan týyndasa kerek. Balqadısha Ybyraıqyzy Aqmola oblysy, Zerendi aýdany Keńótkel eldi mekeniniń týmasy eken.
Aıtýly arýǵa ornatylǵan músinniń ashylý saltanatyna Zerendi aýdanynyń belgili azamattary, kópshilik qaýym qatysty. Ondaǵy basty aıtylǵan oı – eskertkish óskeleń urpaqqa mura bolyp qalatyndyǵy. Jalpy eskertkishtiń bıiktigi 4,2 metr bolsa, salmaǵy 6 tonna tartady. Atalǵan jobanyń avtory – Qazaqstan Respýblıkasy Sýretshiler odaǵynyń múshesi Iýrıı Popov.
Reti kelgende Balqadısha ánin 1925 jyly Ámire Qashaýbaev sonaý Parıj qalasynda ótken dúnıejúzilik festıvalde shyrqap, júldeli oryn alǵany málim. Osylaısha ataqty ánniń keıipkerine aınalǵan Balqadıshaǵa arnap ornatylǵan músin arqyly qazaq qyzdaryna qurmet kórsetilip qana qoımaı, onyń sulýlyǵy arqyly, aqyly men parasattylyǵyn dáripteý jolymen úlgi bolarlyq naqyshta tárbıe jumystaryn júrgizý kózdelgen. Adamnyń ishki jan dúnıesiniń sulýlyǵy syrtqy kelbetinde turatyndyǵyn eskersek, eskertkish arqyly talaı qyzdarymyz ózderiniń boıynda jaqsy qasıetterdi qalyptastyrýǵa umtylary haq.
Asqar TURAPBAIULY,
«Egemen Qazaqstan»
Aqmola oblysy