Bıyl Qostanaı oblysynda jyl saıynǵy dástúrli áleýmettik bastamalar men jobalar jármeńkesi ótti. Oǵan qatysqan 103 adamnyń jumystarynan 29 joba jergilikti ózekti máselelerdi memlekettik jáne bıznes qurylymdaryn tarta otyryp sheshýge baǵyttalǵan. Jármeńke qorytyndysy boıynsha 11 azamattyq bastama men 3 jobany bıznes-qurylymdar qarjylandyrdy.
Qalanyń qonaqjaılyǵyn kóterý maqsatynda «Jas Atameken» jas kásipkerler klýbynyń «Kreatıvter» bastamashyl toby jasaǵan QR-kod ornatýǵa arnalǵan joba úzdikter qatarynan tabyldy. Ony Nurbanktiń Qostanaı oblystyq fılıaly qarjylandyryp, qaladaǵy 30 eskertkish pen tarıhı ǵımaratqa «Qostanaıdy tany» QR-kodyn ornatty.
– «Jas Atameken» jas kásipkerler klýbynyń «Kreatıvter» toby jobasynyń maqsaty – jerlesterimizdiń, qala qonaqtarynyń týǵan jer tarıhyn jaqsy bilýi úshin ýaqyt talabynan qalmaı, jańa formatta jedel áreket etetin ınnovasııalyq qurylǵylar men tehnologııalardy paıdalaný. QR-kod ólkemizdiń tarıhyn nasıhattaýǵa, ony jas býynnyń jaqsy bilýine múmkindik beredi, – dedi oblystyq ishki saıasat basqarmasynyń mamany Abylaı Kákenov.
Bastamashyl top qaladaǵy qasıetti oryndar týraly úsh tilde jazylǵan QR-kodty Ahmet Baıtursynuly eskertkishinen bastap, 30 tarıhı orynǵa jabystyrdy. Ony árkim telefonyna skanerleý arqyly túsirip alady da, tarıhı eskertkish nemese ǵımarat týraly aqparat alýyna bolady.
– Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynda jastardyń týǵan ólke tarıhyn bilýi olardyń boıynda elge, jerge degen patrıottyq sezimdi tárbıeleıtini aıtyldy. «Týǵan jer» baǵdarlamasy da osy aıtylǵan oıdy júzege asyrýǵa baǵyttaǵan. Biz, jas kásipkerler ıgi iske atsalysýdy, oǵan óz úlesimizdi qosýdy oıladyq. Sondyqtan óz bastamamyzben áleýmettik jobalar jármeńkesine qatystyq. Bizdiń jobamyz kúndelikti qarapaıym kórinisten turady desek bolady. Qazir jastardyń qolynan telefon túspeıdi, olar árýaqytta onlaın-rejimdi paıdalanady. Kez kelgen adam smartfonymen QR-kod arqyly biz jasaǵan knowkostanay.kz portalyna kirip, qala tarıhynan habardar bola alady, – dedi «Jas Atameken» jas kásipkerler klýbynyń jetekshisi Zarına Kókjanova.
«Kreatıvter» toby músheleriniń aıtýynsha, mundaı bastama olarǵa Astanada ótken halyqaralyq EKSPO-2017 kórmesinen keıin kelipti. Qazir elimizdiń qaı qalasyna bolsa da sheteldikterdiń kelýi tańsyq emes. Olar kóp ýaqytyn joǵaltpaı-aq QR-kod arqyly qalamyz týraly aqparattarǵa qanyq bolady. Bul ólkemizde týrızmdi damytýǵa da septigin tıgizedi. «Jas Atameken» jas kásipkerler klýby bul jobaǵa tek bank pen oblystyq mádenıet basqarmasyn ǵana emes, qaladaǵy «Sıtı taksı» jolaýshylar tasymalymen aınalysatyn kásiporyndy da tartypty. Qala turǵyny nemese qala qonaǵy QR-kod arqyly taksı shaqyra alady. Mine, ýaqyt aǵymyna ilesý degen osy bolar.
Názıra JÁRIMBET, «Egemen Qazaqstan»
QOSTANAI