Táýelsizdik alǵaly elimizde ótkenimizge úńilý, ózimizdi taný, qajetti qundylyqtardy tarıh tozańynan tazalap, jandandyra kádege jaratý baǵytynda qyrýar ister jasaldy. Bul jan jadyratar jaqsy isterge Memleket basshysy N.Nazarbaevtyń «Bolashaqqa baǵdar: rýhanı jańǵyrý» baǵdarlamasynda berilgen tapsyrmalar taǵy bir qozǵaý saldy.
Elimizde memlekettik tildi latyn árpine kóshirý áńgimesi aıtylǵanyna az bolǵan joq. Osy ýaqyttyń ishinde máseleni talqylap-tarazylaýǵa búkil el atsalysyp, ún qosty. Barlyǵynyń pikiri «latyn árpine kóshý – ýaqyttyń ózi týyndatqan qajettilik, zaman talaby» degen bir arnaǵa toǵysyp jatty. Bul durys pikir, sebebi latyn álipbıi álemde keń qoldanylady. Tehnologııanyń joǵary damyp, aqparattyq tasqyn leginde ómir súrip jatqan kezeńde zaman lebinen kesh qalmaı, kerisinshe aldyn ala qam jasap, oza shaýyp aldyn oraǵan jón. Latyn álipbıine kóshý – bizdiń jáne urpaqtarymyzdyń aqparattyq qoljetimdiligin arttyryp, izdenis-tanym kókjıegin keńeıte túsedi. О́ıtkeni latyn álipbıi XIV ǵasyrdan beri qoldanystaǵy, tildik jáne rýhanı qory mol, búginde aqparattyq keńistikke qanat jaıǵan. Oǵan kóshý bizdiń elimizge mol aqparattyq keńistikte erkin qanat qaǵýǵa, zamanǵa saı laıyqty rýhanı qarýlanýǵa múmkindik beredi.
Keshe ǵana Elbasynyń memlekettik tildi latyn álipbıine kóshirý jónindegi jobany iske asyrý úshin qurylǵan jumys tobynyń múshelerimen kezdesýi bul baǵytta jasalyp jatqan jumystardyń kóńil toltyrarlyq dárejede ekenin taǵy bir dáleldep berdi. Taqyrypqa oraı el arasynan 300-den astam ótinishterdiń túsýi bul máselege halqymyzdyń beıjaı qaramaı, belsendi atsalysqandyǵyn ańǵartady.
Nátıjesinde barlyq baǵyttardy eksheı, álemdik tájirıbeni eskere kele jasalǵan biryńǵaı standart Elbasy nazaryna usynyldy. Atsalysqan birlestikterge, jastarǵa ún qosyp, qoldaý bildirgenderge, sondaı-aq komıssııa múshelerine alǵys aıtqan Memleket basshysy el arasynda túsindirý-nasıhattaý jumystaryn júrgizýge, bilim berý júıesine kezeń-kezeńimen engizýge tapsyrma berdi. Bul bizdiń aldymyzda zor, ári mańyzdy, jaýapty jumystardyń turǵandyǵyn bildiredi. Elimizdiń bolashaǵyna qyzmet etetin ıgi jumystar úshin halqymyzdyń uıysa túsetini sózsiz.
Pánııa SARMÝRZINA,
Mańǵystaý oblystyq mádenıet basqarmasy basshysynyń mindetin atqarýshy