Ortalyq kommýnıkasııalar qyzmetinde 19-20 qazan kúnderi Astanada ótkiziletin jyljymaıtyn múlik máseleleri boıynsha Ortaazııalyq forýmǵa arnalǵan baspasóz máslıhaty uıymdastyryldy.
Oǵan Astana qalasynyń Investısııalar jáne damý mınıstrliginiń basqarma basshysy Álisher Ábdiqadyrov, Astana qalasynyń sáýlet jáne qala qurylysy basqarma basshysy Baqtybaı Taıtalıev, «Astana Konvenshn Bıýro» JShS dırektory Sanııar Áıtekenov, sondaı-aq «Kazakhstan Networking Partners» kompanııasynyń basshysy Ashat Isabekov qatysty.
«2017 jylǵy 19-20 qazan kúnderi Astanada CREW (Commercial Real Estate Week) kommersııalyq jyljymaıtyn múlik aptasy aıasynda Ortaazııalyq «CRE Central Asia-2017» jyljymaıtyn múlik máseleleri jónindegi forým ótkiziledi. Onyń jumysyna Qytaı, Sıngapýr, Ulybrıtanııa, Kanada jáne basqa da elderden saraptaýshylar keledi dep kútilýde. Atalǵan shara Astana ákimdiginiń qoldaýymen Táýelsizdik saraıynda ótkizilip, kommersııalyq jyljymaıtyn múlik naryǵynyń damýymen baılanysty kókeıkesti máselelerin sheshýge baǵyttalǵan. Forýmnyń basty sharasy retinde Astana qalasynyń ákimi Áset Isekeshevtiń shaqyrýymen keletin Ortalyq Azııa elderi men TMD elderiniń Almaty, Shymkent, Ashhabad, Tbılısı, Tashkent, Bishkek sekildi qalalar basshylarynyń kezdesýi oryn alady.
Sonymen qatar forým aıasynda salalyq kórme ótedi. Bul kórmege qatysý úshin Qazaqstannyń aımaqtarynan ınfraqurylymdy sol jerlerde damytyp jatqan qurylys, jobalaý jáne sáýlet kompanııalary, sondaı-aq halyqaralyq ózderiniń tájirıbesi men serpindi jobalary bar, logıstıka jáne ónerkásiptik jyljymaıtyn múlikpen aınalysatyn kompanııalar, júzege asyrýǵa jatatyn qoıma, ónerkásiptik nysandary shaqyrylǵan.
Ulttyq jáne sheteldik buqaralyq aqparat quraldarynyń qatysýymen forým ártúrli nomınasııalar boıynsha jyljymaıtyn múlik salasyndaǵy «Commercial Real Estate Awards-2017» jyl saıynǵy kásibı júldesin marapattaýymen aıaqtalady.
Raýan QAIDAR,
«Egemen Qazaqstan»