Astana ákimi qaladaǵy áleýmettik mańyzy bar nysandardy aralady, dep habarlaıdy qalanyń medıa ortalyǵy.
Qala basshysy №73 fızıka-tehnıkalyq mektebine bardy. Munda oqý ǵımaratynyń aınalasyndaǵy ınfraqurylym máselesi qordalanyp qalǵan. Mekteptiń aınalasyndaǵy qarqyndy júrip jatqan qurylystyń saldarynan ata-analar men oqýshylar aınalyp ótýge májbúr. Mekteptiń janynda avtobýs aıaldamasy joq, kósheni jaryqtandyratyn shamdar jetkiliksiz, al qurylys aýmaǵy qorshaýsyz jatatyn.
Apparat jınalysynda Á.Isekeshev aýdan ákimderi men tıisti basqarmalarǵa 28 bilim oshaǵyndaǵy jaıaý jol júrginshileri men júretin joldyń jetkiliksizdigin aıtyp, máseleni sheshýge tapsyrma bergen bolatyn.
Osyǵan baılanysty qala ákimi jaýapty tulǵalarǵa qatań sógis jarııalap, aýdandaǵy bilim mekemelerindegi olqylyqtardy retteýge bir apta merzim berdi.
«Mektepke deıingi joldar men kire beristegi joldar balalar men ata-analar úshin yńǵaıly ári qaýipsiz bolýy kerek. Oqýshylar mektepke deıin kedergisiz jetýi tıis. Ony jasaý - qalalyq bıliktiń mindeti. Biz balalarǵa sapaly bilim alý úshin jaǵdaı jasaýǵa mindettimiz», - dedi Á.Isekeshev.
Qazirgi tańda turǵyndar jol jabyndysy joq dep jıi shaǵymdanǵan kóshelerde qurylys jumystary qarqyndy júrip jatyr. Qalalyq ákimdiktiń málimeti boıynsha, jyl sońyna deıin turǵyn úı alabyna aparatyn 50 kóshe salynyp bitedi. Máselen, Aqan seri kóshesindegi qurylys aıaqtaldy. Qala ákimi qurylys jumystarynyń sapasyn tekserip, jol jóndeýshiler jibergen kemshilikterdi túzeýge naqty tapsyrmalar berdi.