Belgili sport jýrnalısi, 18 kitaptyń avtory, 20 jyldan astam ýaqyt respýblıkalyq «Egemen Qazaqstan» gazetiniń Shyǵys Qazaqstan oblysyndaǵy menshikti tilshisi qyzmetin atqarǵan Ońdasyn Elýbaı shyǵarmashylyǵyna 50 jyl tolýyna oraı Zaısan aýdanyna arnaıy baryp, jerlesterimen júzdesip qaıtty.
Bir emes, birneshe Olımpıadaǵa, álem chempıonattaryna barǵan jıhankez jýrnalıst eń áýeli ózi týyp-ósken Sarjyra aýylyndaǵy mektepte eldimeken jurtshylyǵymen, bilim ordasynyń ustazdarymen jáne oqýshylarmen kezdesip, emen-jarqyn áńgime-dúken qurdy. «Qaıda júrsem de Sarjyramdy ańsap turamyn. Bala kezimizde myna irgedegi Mójik ózenine baryp sýǵa túsetinbiz» dep balalyq bal shaǵyn saǵyna eske alyp, mektep kitaphanasyna óziniń jáne basqa da aqyn-jazýshylardyń 50 kitabyn syıǵa tartty. Bir jyldary aýyl mektebine jabylý qaýpi tóngende O.Elýbaı bilim ordasyn aman saqtap qalýǵa úles qosqan eken. Sodan da bolar perzenttik paryzyna adal qalamgerdi aýyl turǵyndary qushaq jaıa, shashýmen qarsy alyp, jyly lebizderin bildirip, shapan jaýyp, syı-qurmet kórsetti. Al shaǵyn ǵana aýyl Sarjyranyń balalary kezdesýdi úsh tilde júrgizip, shalǵaıda jatsa da órkenıet kóshinen qalmaı kele jatqandyqtaryn ańǵartty. Týǵan aýylynan keıin ardager jýrnalıst Zaısan qalasyndaǵy M.Dáýlenov atyndaǵy orta mektepte aýdan jurtshylyǵymen kezdesý ótkizdi. Kezdesýdi ashqan aýdan ákimi Temirbek Qasymjanov Elbasynyń «Rýhanı jańǵyrý» baǵdarlamasy aıasynda Zaısan óńirinde arnaıy baǵdarlama ázirlenip, elge tanymal tulǵalardyń qatysýymen birqatar taǵylymdy sharalardyń uıymdastyrylǵanyn atap ótti. «Sáýir aıynan beri kóptegen sharalar ótkizdik. Shiliktiniń týmasy Ǵazız Ádilhannyń keshin uıymdastyrdyq. Osy rette bizdiń aýdannyń ǵana emes, oblysymyzdyń maqtanyshy Ońdasyn Elýbaı aǵamyzǵa elge kep esep berseńiz, jerlesterińizben júzdesseńiz dep ótinish jasaǵan edik. Tilegimizdi jerge tastamaı, týǵan jerine taǵzym etip kelgenine alǵys bildiremiz», - dedi ol.
Sport jýrnalısimen О́skemennen birge kelgen qol kúresinen Álemniń úsh dúrkin, Azııanyń 10 dúrkin chempıony, elimizdegi qol kúresi men gir sportynyń negizin qalaýshy Muqan Aǵzamov kezdesýde sóz alyp, O.Elýbaıdyń sport salasyna sińirgen eńbegi zor ekenin tilge tıek etti. Jarty álemdi sharlaǵan jıhankez jýrnalıst óz kezeginde Sıdneı Olımpıadasynda Olga Shıshıgına men Bekzat Sattarhanovtyń jeńisine kýá bolǵan umytylmas sátterdi tebirene eske alyp, ýnıversıtte orkestr quramynda bolyp, Eskendir Hasanǵalıev pen Nurǵalı Núsipjanovtan sabaq alǵanyn áńgimelep, qolyna dombyrasyn alyp, kúmbirletip kúı tartyp berdi. Kezdesý barysynda bıyl Almatyda ótken qysqy Ýnıversıada jaıynda syr shertetin «Alataýdy dúbirletken 11 kún» atty kitabynyń tusaýkeserin ótkizdi.
Azamat QASYM,
«Egemen Qazaqstan»
Shyǵys Qazaqstan oblysy,
Zaısan aýdany.