Májilis Tóraǵasy Nurlan Nyǵmatýlın bastaǵan qazaqstandyq parlamentshiler delegasııasy Sankt-Peterbýrgtegi Parlamentaralyq Odaqtyń 137-shi Assambleıasyna qatysty, dep habarlady Májilistiń baspasóz qyzmeti.
Bıylǵy jyly búkil álemnen kelgen parlamentshilerdiń basqosýy Parlamentaralyq Odaq tarıhyndaǵy asa iri sharalardyń birine aınaldy. Beıbit suhbatty ilgeriletýge baǵyttalǵan kúsh-jigerdi biriktirý úshin forýmǵa 100-ge jýyq sheteldik parlament tóraǵalary men álemniń 160 elinen delegasııalar jınaldy.
Basty talqylanǵan máseleler qatarynda adam quqyqtary men bostandyqtaryn qorǵaý, lańkestikke qarsy kúres, turaqty jahandyq damý, áıelder men jastardyń saıasat pen ekonomıkadaǵy róli týraly boldy.
Parlamentaralyq Odaqtyń 137-shi Assambleıasyn Reseı Prezıdenti Vladımır Pýtın ashty.
Reseı memleketiniń basshysy elder arasyndaǵy senimdi nyǵaıtýǵa, halyqaralyq jáne aımaqtyq kúrdeli problemalarǵa ymyraly sheshimderdi tabýǵa kómektesetin qazirgi zamanǵy jaǵdaılarda parlamentaralyq dıplomatııanyń mańyzdylyǵyn atap ótti.
Sonyń ishinde terrorızmmen kúreste kúsh biriktirýge, Sırııadaǵy jaǵdaıdy turaqtandyrýǵa erekshe nazar aýdaryldy. Taıaýda Qazaqstanda Astana qalasyndaǵy kelissózde Reseı, Iran, Túrkııa syndy kepil-memleketterdiń qatysýymen jáne basqa da kóptegen memleketterdiń qoldaýymen qol jetkizgen Sırııadaǵy de-eskalasııalyq tórt aımaq týraly kelisimder jasalǵan bolatyn. Bul kelisimder BUU-nyń qararyn oryndaýǵa jáne alǵa jyljytýǵa jaǵdaı jasaıtyny týraly Vladımır Pýtın aıtyp ótti.
Májilis Tóraǵasy Nurlan Nyǵmatýlın jalpy pikirtalasta sóılegen sózinde ǵalamdyq jáne aımaqtyq qaýipsizdik máselelerin sheshý baǵytyndaǵy Qazaqstan tájirıbesine jáne Elbasynyń mańyzdy bastamalaryna toqtaldy.
– Qazaqstan Prezıdenti Nursultan Nazarbaev 2015 jyly Nıý-Iorkte BUU Bas Assambleıasynyń 70-sessııasynda Birikken Ulttar Uıymy uranymen terrorızmge qarsy ǵalamdyq koalısııany qurýǵa baǵyttalǵan halyqaralyq terrorızmge qarsy is-qımyl jónindegi birqatar bastamalar usyndy. Biz Parlamentaralyq Odaqqa múshe-memleketter parlamentindegi áriptesterimizdi Qazaqstan Prezıdentiniń Birikken Ulttar Uıymynyń aıasynda «Terrorızmnen azat álemge qol jetkizý jónindegi minez-qulyq kodeksin» ázirleý jáne qabyldaý týraly bastamasyn qoldaýǵa shaqyramyz.
Bul HHI ǵasyrdyń eń qaýipti qaterleriniń biri – terrorızmge qarsy kúreste álemdik parlamentaralyq qaýymdastyqtyń salmaqty úlesi bolady dep senemin, – dedi N.Nyǵmatýlın.
Sondaı-aq Májilis Tóraǵasy Qazaqstanda qalyptasqan jáne tabysty damyp kele jatqan konfessııaaralyq jáne etnosaralyq únqatysýdyń biregeı modeli týraly áńgimeledi.
Qazaqstannyń etnostyq toptarynyń mádenıeti men tilderin damytýǵa, ultaralyq kelisimniń tıimdi ınstıtýttaryn qalyptastyrýǵa, sondaı-aq dinaralyq dıalogqa baǵyttalǵan maqsatty memlekettik saıasatty da atap ótti.
Májilis Tóraǵasy elimizdegi etnosaralyq qatynastardy úılestirýdiń biregeı ınstıtýtyna aınalǵan Qazaqstan halqy Assambleıasy týraly aıta kele, Assambleıanyń BUU, IýNESKO jáne EQYU-da alǵan joǵary baǵasyn atap ótti.
Májilis Tóraǵasy jahandaný jaǵdaıynda jáne mádenıetaralyq qarym-qatynastarda ulttyq mádenıetterdi saqtaý salasyndaǵy elimizdiń jetistikteri týraly, sondaı-aq Parlamentaralyq Odaqtyń basqa da múshe memleketteriniń osy saladaǵy oń tájirıbesin atap ótti.
Parlamentaralyq Odaq – 1889 jyly qurylǵan eń kóne halyqaralyq parlamenttik uıym bolyp tabylady. Búgingi kúni parlamentshiler 173 el men 11 parlamentaralyq uıymdardy biriktiredi. О́z damý tarıhynda PAO parlamentarızmniń damýyna, adam quqyqtaryn saqtaýǵa, halyqaralyq beıbitshilikti ornatýǵa jáne halyqaralyq qaýipsizdikti saqtaýǵa yqpal etedi.
Sankt-Peterbýrgtegi 137-shi Assambleıa barysynda Parlamentaralyq Odaqtyń alty geosaıası toptarynyń otyrystary ótti.
Parlamentaralyq Odaqtyń 137-shi Assambleıasynyń negizgi oqıǵalarynyń biri «Demokratııa týraly jalpyǵa ortaq deklarasııasynyń 20 jyldyǵy: bizdiń alýan túrliligimizdiń ortaqtyǵy» týraly qarary boldy.