Elbasynyń «Rýhanı jańǵyrý» baǵdarlamasyn iske asyrý aıasynda óńirimizde 15 shilde men 30 qyrkúıek aralyǵynda «Úzdik shaǵyn qala», «Úzdik aýdan» jáne «Úzdik aýyl» atalymdary boıynsha oblystyq baıqaý uıymdastyryldy.
Bul maqsatta aımaqta arnaıy kóshpeli komıssııa qurylypty. Komıssııa músheleri úzdik ataǵyna úmitker 15 aýyl men kentten, 2 shaǵyn qala jáne 15 aýdannan ınfraqurylymy damyǵan, barynsha kógaldandyrylǵan, abattandyrylǵan eldi mekenderdi tańdap alypty. «Baıqaýdyń bastapqy kezeńinde ótinimder jınalyp, úmitkerlerdiń tizimi jasaldy. Budan soń 14 tamyzdan 8 qyrkúıekke deıin konkýrstyq komıssııa músheleri tańdalyp alynǵan eldimekenderdi aralap, kórdi», – deıdi oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Rınat Bolatqan.
Eldimekender ǵımarattardyń, kóshe shamdarynyń, asfalt jabyndysynyń, qorshaýlardyń, arhıtektýralyq formalardyń, balalar alańdarynyń, turmystyq qaldyq alańshalarynyń, jeke úılerdiń jaǵdaıy, jasyl jelek sany jáne taǵy basqa da ólshemder boıynsha baǵalanypty. Quramyna oblystyq basqarmalardyń, «Nur Otan» partııasy fılıalynyń ókilderi jáne qoǵamdyq keńestiń músheleri engen komıssııaǵa oblys ákiminiń orynbasary Serik Aqtanov jetekshilik jasapty.
Sonymen, «Úzdik shaǵyn qala» atalymynda 1 oryndy Aıagóz, ekinshi oryndy Shemonaıha shahary ıelense, «Úzdik aýdan» atalymynda 1 oryndy Zaısan, 2 jáne 3 oryndardy tıisinshe Úrjar men Katonqaraǵaı aýdandary qanjyǵalaryna baılapty. Aıagóz aýdanyndaǵy Shyńǵoja aýyly «Úzdik aýyl» dep tanylsa, Shemonaıha aýdanynyń Kamyshenka jáne Tarbaǵataı aýdanynyń Aqjar aýyldary 2,3 oryndarǵa taban tiregen kórinedi. Aldaǵy ýaqytta baıqaý jeńimpazdaryna abattandyrý maqsatynda granttar tabystalatyn bolady.
Azamat QASYM,
«Egemen Qazaqstan»
Shyǵys Qazaqstan oblysy