Búgin Elbasy Nursultan Nazarbaev Energetıka mınıstri Qanat Bozymbaevty qabyldap qazaq qoǵamyn alańdatyp otyrǵan janar-jaǵarmaı máselesin talqylady.
Kezdesýde Prezıdent Energetıka mınıstrliginiń jumysyna kóńili tolmaıtyndyǵyn, naqtyraq aıtqanda, mınıstrlik janar-jaǵarmaımen qamtamasyz etý boıynsha tıisti sheshimderdi ýaqtyly qabyldamaǵanyn aıtty.
– Energetıka mınıstrligi elimizdiń otyn-energetıka máselelerine, sonyń ishinde ishki naryqty janar-jaǵarmaımen qamtamasyz etýge jaýapty. Elimizde onyń tapshylyǵyna baılanysty oryn alǵan ahýal Úkimet pen Energetıka mınıstrligi tarapynan nemquraılylyq pen jaýapsyzdyqqa jol berilgenin kórsetip otyr. Siz bıylǵy mamyr aıynda munaı óńdeý zaýyttaryna jóndeý jumystaryn júrgizý kestesin bekittińiz. Kúzde úsh zaýyttyń ekeýi jóndeý úshin toqtatylatynyn bildińiz. Mundaı jaǵdaı jyl saıyn qaıtalanyp keledi. Sony bile tura, aldyn-ala daıyndalyp, halyqty qamtamasyz etý úshin qajetti kólemde janar-jaǵarmaı jetkizýge tıis edińiz. Olaı bolmady, – dedi Memleket basshysy.
Sonymen qatar, N.Nazarbaev mınıstrliktiń janar-jaǵarmaı naryǵyndaǵy jaǵdaıdy retteýge arnalǵan sharalarynyń tıimdiligi tómen bolǵanyn atap ótti.
– Siz usynǵan jaqsy bastamalar az emes. Olar meniń tarapymnan da, Úkimet tarapynan da qoldaý taýyp keledi. Janarmaı tapshylyǵyn boldyrmaý úshin baǵany memlekettik retteýden bas tartý usynyldy. Alaıda, naryqta taǵy da janar-jaǵarmaı jetispeýshiligi oryn aldy. Osyǵan baılanysty, Úkimettiń usynysy boıynsha sizge sógis jarııaladym. Bul – qyzmetten bosatylǵanmen birdeı, – dedi Elbasy.
О́z kezeginde, Qanat Bozymbaev Memleket basshysyna Pavlodar jáne Atyraý munaı óńdeý zaýyttaryn jańǵyrtý jumystarynyń barysy týraly málimdedi.
– Eki munaı óńdeý zaýytyn jetildirip, jańǵyrtý bıyl aıaqtalady. Qarasha aıynda Pavlodardaǵy zaýytty iske qosý josparlanyp otyr. Atyraýdaǵy munaı óńdeý zaýytyndaǵy jumystardy osy jyldyń 16 jeltoqsanyna deıin aıaqtaý kózdelgen. Munda munaı ónimderiniń kólemin arttyrýǵa jáne olardyń sapasyn jaqsartýǵa múmkindik beretin katalıtıkalyq krekıng qurylǵysy birinshi ret paıdalanylatyn bolady, – dedi mınıstr.
Q.Bozymbaev Memleket basshysyna Shymkenttegi munaı óńdeý zaýytynda da joǵary oktandy benzın shyǵarýǵa arnalǵan katalıtıkalyq krekıng qurylǵysyn salý josparlanyp otyrǵany týraly málimdedi.
Energetıka mınıstri kelesi jyly Qazaqstan naryǵy joǵary sapaly janarmaımen, sonyń ishinde avıasııalyq janarmaımen qamtamasyz etiletinin aıtty.
Sońynda Qazaqstan Prezıdenti naryqty janar-jaǵarmaımen qamtamasyz etý úshin jaýapkershilik júkteletinin taǵy da eskertip, janarmaı tapshylyǵyn boldyrmaý úshin barlyq qajetti sharalar qabyldaýdy tapsyrdy.
Eske sala keteıik, ótken aptada Premer-Mınıstr Saǵyntaev Úkimettiń keńeıtilgen jınalysynda eldegi janar-jaǵarmaı tapshylyǵyna qatysty mınıstr Bozymbaevtyń baıandamasyn tyńdap, atalǵan máselege qatysty suraqtar qoıdy. Mınıstrdiń jaýaptary Úkimet basshysynyń kóńilinen shyqpasa kerek, Premer-Mınıstr óz quzyreti sheginde, Energetıka vıse-mınıstri Áset Maǵaýovty jumystan bosatyp, mınıstr Bozymbaevqa sógis jarııalaý týraly Elbasyǵa usynys engizdi. Prezıdent elimizdiń Bas mınıstrin qoldap Qanat Bozymbaevqa sógis jarııalanǵan bolatyn.