Sh.Ýálıhanov atyndaǵy Kadet korpýsynda Qarýly Kúshterdiń úzdik serjanty ataǵy úshin VIII Búkilarmııalyq baıqaýy qorytyndylandy.
Baıqaýǵa Qarýly Kúshter túrleri, ásker tekteri, óńirlik qolbasshylyq áskerleri, bas basqarmalar men áskerı oqý oryndary aýqymynda ótkizilgen baıqaýlardyń jeńimpaz serjanttary (starshınalary) tartyldy.
Budan buryn ótkizilgen baıqaýlardan bul sharanyń basty ereksheligi Búkilaramııalyq baıqaý tarıhynda alǵash ret ózge memlekettik vedomstvolardyń ókilderi qatysty. Sonymen Memlekettik kúzet qyzmetiniń namysyn 6 serjant qorǵap, al Ulttyq ulannyń abroıyn 4 baqylaýshy asqaqtatty.
Jalpy, baıqaýǵa elimizdiń túkpir-túkipirinen 16 komandadan quralǵan 75 serjant qatysyp, alty atalym boıynsha úzdikter anyqtaldy. Atap aıtqanda, olar:«Qarýly Kúshter túri men ásker teginiń, óńirlik qolbasshylyqtyń «úzdik serjanty», «úzdik brıgada serjanty», «úzdik batalon serjanty», «úzdik rota serjanty», «úzdik vzvod serjanty» jáne «úzdik bólimshe serjanty» (tank, jaýyngerlik mashına, eseptop, qondyrǵy).
Sharaǵa bas shtabtyń taǵaıyndaǵan arnaıy komıssııasy tórelik jasap, ádiletti sheshimder qabyldandy. Sonyń nátıjesinde, «Úzdik óńirlik qolbasshylyq serjanty» atalymynda «Shyǵys» óńirlik qolbasshylyǵynyń serjanty shtab-serjant Ǵalymjan Táýkebaev jeńis tuǵyrynan kórinse, «Úzdik brıgada serjanty» 14776 áskerı bóliminiń serjanty 2-synypty serjant Janat Beshalın, «Úzdik batalon (dıvızıon) serjanty» 35748 áskerı bóliminiń 3-synypty serjanty Maqsat Jaqsybek, «Úzdik rota serjanty» ataǵyn 75488 áskerı bólimi rotasynyń aǵa serjanty Samat Abaıuly, «Úzdik vzvod serjanty» ataǵyn 41433 áskerı bóliminiń vzvod serjanty Ermek Zaılagı jáne «Úzdik bólimshe komandıri» ataǵyn 44736 áskerı bóliminiń bólimshe komandıri serjant Arnat Námetov ıemdendi.
Al komandalyq esepte birinshi oryndy «Ońtústik» óńirlik qolbasshylyǵynyń serjanttary, ekinshi oryndy «Shyǵys» óńirlik qolbasshylyǵynyń serjanttary jáne úshinshi oryndy Desanttyq-shabýyldaý áskerleriniń serjanttary enshiledi.
Uıymdastyrýshylardyń aıtýynsha, baıqaýdyń jyl saıyn dástúrli túrde ótkizilýi serjanttar quramynyń kásibı sheberligin arttyrýǵa yntalandyryp, sarbazdardyń jaýyngerlik rýhyn oıatady. Sondaı-aq óńirlik qolbasshylyqtar men ásker tekterinde serjanttar quramynyń daıyndyq deńgeıin baǵalaýǵa múmkindik beredi.
«Egemen-aqparat»