Qysylǵanǵa qoldaý tanytyp, aınalasyna shapaǵat shýaǵyn shashyp júretin jandar kóp bolmasa da, bar. Olar jasaǵan jaqsylyǵyn aıtyp aınalasyna jar salmaıdy. Biraq ol azamattardyń eńbegin elep, basqalarǵa úlgi etý kóptegen saýapty iske jol ashady. Jyl saıyn dástúrli túrde Almatyda ótetin ulttyq qoǵamdyq qaıyrymdylyq aıasyndaǵy «Altyn júrek» syılyǵynyń bıylǵy úzdik úmitkerleri anyqtaldy. Uıymdastyrýshylardyń aıtýynsha, «Altyn júrek» syılyǵyna bıyl 450 ótinish kelip túsken.
«Altyn júrek» ulttyq syılyǵynyń uıymdastyrýshylary 11 jyl qatarynan elimizdegi naǵyz meıirban, jany jomart jandardy izdep taýyp, qaıyrymdylyq qasıetti boılaryna sińirgen altyn júrek azamattardy marapattap keledi. Atalmysh shara jyl saıyn «Baýyrjan» qaıyrymdylyq qorynyń bastamasymen, «Nur Otan» partııasy, «Altyn Qyran» kompanııalar toby, «PetroQazaqstan» AQ, Almaty qalasy ákimdiginiń qoldaýymen júzege asýda.
Altyn júrek atyna laıyq úmitkerlerdi anyqtaý barlyq kelip túsken ótinishter ishinen eksperttik keńeste saralanyp, ár atalym boıynsha úsh úmitkerden anyqtalady. Eń bastysy, ár úmitker ulttyq syılyqqa usynylǵany jaıly habarsyz. Iаǵnı atymtaı jomart jandar men qaıyrymdylyq jasaǵan mekemelerdi ıgi isterine kýá bolǵan jandar usynady.
Uıymdastyrý komıtetiniń málimeti boıynsha, 2016 jyldan bastap dál búginge deıin el aýmaǵy boıynsha 29,4 mıllıard teńge kóleminde qaıyrymdylyq kómek kórsetilgen. 16 sport mektebi, 29 balabaqsha, 23 jalpy bilim beretin mektepke jóndeý jumystary júrgizilgen. 3 múgedek balalarǵa arnalǵan mamandandyrylǵan balabaqsha salynyp, 10 myńnan astam jetim bala jazǵy demalystarynda túrli demalys lagerlerine barýǵa joldama alǵan. Demeýshilerdiń kómeginiń arqasynda 33 kompıýterlik synyp pen 8 aýrýhana jabdyqtalǵan. Jaǵdaıy tómen otbasynan shyqqan 800-ge tarta jasóspirim mektepke qajetti quraldarmen qamtylǵan. Uly Otan soǵysynyń 26 ardageriniń úılerine jóndeý jumysy júrgizilip, 500 tyl ardageri men soǵys ardagerine qarjylaı qoldaý kórsetilgen. Aıtýǵa jeńil bolǵanmen, joǵarydaǵy sandarǵa qarap tek birer jyldyń ishinde qaıyrymdy jandar tarapynan osynshama ıgi isterdiń qolǵa alynǵany kóńilińdi qýantyp, janyńdy jadyratady.
Bıylǵy baıqaýǵa kelip túsken 500-ge tarta ótinishtiń ishinen «Jetim balalarǵa kórsetken qamqorlyǵy úshin», «Bilimdi damytýǵa qosqan úlesi úshin», «Múgedek jandarǵa kórsetken qamqorlyǵy úshin», «Sportty damytyp, ony qoldaǵany úshin», «Ardagerlerge kórsetken qurmeti úshin», «Jyl mesenaty», «Aqparattyq qoldaýshy», «Jyldyń qaıyrymdy adamy», «Jyl uıymy», «Densaýlyq saqtaý salasyna qoldaý kórsetkeni úshin», «Qazaqstannyń órkendeýine qosqan úlesi úshin» syndy 11 atalym boıynsha 33 úzdik úmitker anyqtaldy. Úmitkerlerdiń qatarynda esimi elge belgili saıasatkerler men kásipkerler, aty kópke málim mekemeler men uıymdar bar. Qoǵamdyq keńes músheleriniń pikirinshe, «Altyn júrek» syılyǵy – qoǵamda ıgi ispen aınalysatyn jandardyń saýapty ispen aınalysýǵa degen qulshynysyn arttyratyn shara.
– «Altyn júrek» syılyǵy aldymen halyqqa qajet. Sebebi ol qaıyrymdylyqtyń nyshany. Kez kelgen adam altyn júrek atyna laıyq bolýǵa tyrysady. Sondyqtan meıirimdi ispen aınalysýǵa erik-jigerin arnaıdy. Al olardy bul isteri úshin baǵalaý artyqtyq etpeıdi. «Altyn júrek» adamdardy bir arnada toǵystyrady, óıtkeni jaqsylyqtyń shekarasy ólsheýsiz. Atalǵan joba qaıyrymdylyq tarıhyna jańa tulǵalardyń esimderin engizedi. Ásirese qoǵamda óz ıgi bastamalaryn jar salmaıtyn atymtaı jomart jandarǵa alǵys aıtýǵa múmkindik beredi, – deıdi keńes múshesi, jýrnalıst Adel Orazalıeva.
Osylaısha, iriktelip shyqqan úzdik úmitkerler ishinen izgilik jasaýda aldyna jan salmaǵan 11 adam «Altyn júrek» ulttyq syılyǵynyń jeńimpazy atanady. Jeńimpazdardy marapattaý rásimi qazan aıynyń sońynda Almatyda ótedi dep kútilýde.
Arman OKTIаBR, «Egemen Qazaqstan»
ALMATY