Mańǵystaý oblysynyń ákimi Eraly Toǵjanov Birikken Arab Ámirliginen kelgen (BAÁ) Sheıh Sýrýr bın Muhammed ál-Nahaııan men Sheıhtyń Qazaqstandaǵy ókili Muhammed Bahýshty qabyldady.
Kezdesý barysynda Sheıh Sýrýr bın Muhammed ál-Nahaııan oblysqa ınvestısııa salyp, is bastaýǵa ázir ekendigin aıtyp, Aqtaý qalasynda júzege asyrylatyn jobalaryn kórsetti.
«Aldaǵy ýaqytta Aqtaý qalasynyń gúldenýine biz de óz tarapymyzdan úles qosqymyz keledi. Aldymen teńiz jaǵasyndaǵy úńgirlerdi ádemilep, retke keltirýdi qolǵa alamyz. Odan bólek 35 qabatty turǵyn úı salý, sońǵy úlgidegi meıramhana, saýda ortalyqtary men alańdardy turǵyzýdy da josparlap otyrmyz. Týrısterdi Mańǵystaý oblysyna tartý úshin barlyq jaǵdaıdy jasaýdyń jolyn qarastyramyz. Atalǵan jobalar qoldaý tapsa, keler jyly qurylys jumystary bastalady. Osylaısha, aldaǵy ýaqytta da eki el arasynda tabysty yntymaqtastyq qatynas nyǵaıa túsedi dep úmittenemin», – dedi jıynda sóz alǵan Muhammed Bahýsh.
Kezdesý sońynda eki tarap Mańǵystaý oblysy men Birikken Arab Ámirliginiń uıymdastyrýymen ekonomıkalyq forým jáne túıeler jarysyn ótkizýge ýaǵdalasty.
Gúlaıym ShYNTEMIRQYZY, «Egemen Qazaqstan»