Qalalyq turǵyn úı ınspeksııasy basqarmasy elordanyń kóppáterli turǵyn úıleriniń basqarylýyn jáne olardyń jaǵdaıyn ınspeksııalaý men baqylaý sharalaryn belsendi túrde júrgizýde. Bul týraly astana.gov.kz habarlady.
Aýdan ákimdikterimen birlesip júrgizilgen jumystardyń nátıjesinde tirkelgen kondomınıým sany 95% jetkizildi. Osylaısha, Astana atalmysh kórsetkish boıynsha respýblıkada kósh bastap tur.
Kondomınıýmnyń tirkelýi páter ıelerine ózderiniń ortaq múlkin tolyq túrde paıdalaný, óz úıin basqarýdyń kez kelgen formasyn tańdaý quqyǵyn beredi.
Munymen qosa, «109» dıspetcherlik qyzmeti turǵyndardyń qyzmet kórsetý jáne basqarýshy kompanııalar men PIK-niń eskertýleri boıynsha ótinishteri men shaǵymdaryn qabyldaıdy.
«Jabyndylardy, podezderdi, lıfterdi, qasbetterdi kúrdeli jóndeýden ótkizý, qomaqty qarjyny talap etetin jabdyqtardy, sorǵyshtardy, jylý almastyrǵyshtardy aýystyrý sharalary qazirgi tańda aı saıyn tólenip jatqan tólemderdiń esebinen júrgizilýi tıis nemese jergilikti bılik atalmysh maqsattarǵa qarjy bólip, qyzmet kórsetýshi uıymdy aýystyrýy qajet», - delingen qalanyń turǵyn-úı ınspeksııasynyń habarlamasynda.
Sonymen qatar, oryn (páter) ıeleri kondomınıým nysany bolyp tabylatyn ortaq múlkin kúrdeli jóndeý jumystaryna ketetin qarajatty jınaý úshin kondomınıým nysanyn basqarýshy organnyń jınaq esebine oryn (páter) ıeleriniń jınalystarynda anyqtalǵan kólemde aı saıyn jarna tólep otyrýy kerek.
Vedomstvonyń málimetinshe, búgingi tańda keıbir kóppáterli turǵyn úılerde aldaǵy jylytý maýsymyna daıyndyq kezinde jylý almastyrǵyshtardy aýystyrý boıynsha problemalardyń barshylyǵyn saraptama kórsetip otyr. Turǵyndar jınalystarǵa qatyspaǵandyqtan, olqylyqtardy joıýǵa jumsalatyn turǵyndardyń úleskerlik qarjysy baıaý jınalady.
Úı ishindegi ınjenerlik jelilermen, jabyndylarmen, qasbettermen baılanysty problemalar da bar.
Osyǵan baılanysty Astana turǵyndaryna kondomınıýmdardy tirkeý kerektigi jaıly keńes beriledi.
Esterińizge salaıyq, qalada 2513 kóppáterli úı bar. Olarǵa 431 PIK men qyzmet kórsetýshi uıymdar qyzmet kórsetedi.