Ońtústik Qazaqstan oblysynda batyr analar qatary 2382 adamǵa tolyqty. Osy jyldyń segiz aıynda óńirdegi 504 ana «Altyn alqa» taqsa, 1878 áıel azamaty «Kúmis alqa» ıegeri atandy.
Kóp balaly analardyń sany jyldan-jylǵa artyp keletin Ońtústik óńirinde búgingi tańda demografııaǵa úles qosyp júrgen analardyń sany 159729-ǵa jetip otyr. Onyń ishinde 5618 Batyr ana bolsa, 23920 ana «Altyn alqa», 34806 áıel «Kúmis alqa» ıegeri. Al, 7928 ana I-II dárejeli Ana Dańqy orden ıegeri, 87457 azamatsha 18 jasqa deıingi tórt jáne odan kóp balasy bar analardyń qataryn tolyqtyrǵan.
Kóp balaly analar qatary boıynsha kóshti bastap turǵan Shymkent qalasynyń turǵyndary. Oblys ortalyǵyndaǵy analardyń sany – 19278. Shymkentten keıingi orynda Saryaǵash pen Maqtaaral aýdandary. Saryǵashtaǵy 13306 altyn qursaqty ana bolsa, Maqtaaralda 11282 azamatsha kóp balaly retinde tirkelgen. Osylaısha, kóp balaly názik jandylar kóshin Túrkistan, Saıram, Ordabasy, Qazyǵurt, Tólebı, Shardara, Túlkibas, Arys, Báıdibek, Kentaý qalasy men Otyrar, Sozaq aýdandarynyń aq jelekti, altyn qursaqty analary jalǵaıdy.
Ońtústik Qazaqstan oblysynda osy jyldyń segiz aıynda 50627 sábı týylǵan. Dúnıe esigin ashqan nárestelerdiń ishinde 514-i egiz bolsa, 3-ýi úshem.
Elimiz Táýelsizdigin alǵannan keıin densaýlyq saqtaý salasyn qarjylandyrýdy arttyrý esebinen jańa medısınalyq mekemeler salyndy.Materıaldyq-tehnıkalyq jabdyqtaý jaqsardy. Zamanaýı qural-jabdyqtar men qondyrǵylar oblys ortalyǵynda ǵana emes, aýdandar men qalalarda ornatyldy. Osynyń nátıjesinde, óńirde ana men bala ólimi azaıyp, týý kórsetkishi artyp keledi.